മരട് ഫ്ലാറ്റ്; കോടതി വിധി നടപ്പാക്കണമെന്ന് കാനം രാജേന്ദ്രൻ

സുപ്രീം കോടതി വിധി നടപ്പിലാക്കരുതെന്ന നിലപാടെടുക്കാൻ സാധിക്കില്ല. നിയമം ലംഘിച്ചത് ബിൽഡേഴ്‌സ് ആണ്. പരമ്പരാഗതമായി യു.ഡി.എഫിനൊപ്പം നിൽക്കുന്ന പാലായില്‍ ഇത്തവണ എല്‍ഡിഎഫ് ജയിക്കുമെന്നും കാനം പറഞ്ഞു.

കോട്ടയം: മരട് ഫ്ലാറ്റ് വിഷയത്തിൽ സി.പി.ഐ നിലപാട് വ്യക്തമാക്കി സംസ്ഥാന സെക്രട്ടറി കാനം രാജേന്ദ്രൻ. സുപ്രീം കോടതി വിധി നടപ്പിലാക്കരുതെന്ന നിലപാടെടുക്കാൻ സാധിക്കില്ല. നിയമം ലംഘിച്ചത് ബിൽഡേഴ്‌സ് ആണ്. അവരിപ്പോൾ ചിത്രത്തിൽ പോലുമില്ല. കാശ് മുടക്കി ഫ്ലാറ്റ് വാങ്ങിയവർ കുറ്റക്കാരുമല്ല. ഈ സാഹചര്യത്തിൽ എന്ത് ചെയ്യാനാകുമെന്ന് സർക്കാർ ചർച്ച ചെയ്ത് തീരുമാനിക്കുമെന്നും, നിയമം നടപ്പിലാക്കണമെന്ന നിലപാടുള്ള പാർട്ടിയാണ് സി.പി.ഐയെന്നും കാനം പറഞ്ഞു.

പരമ്പരാഗതമായി യു.ഡി.എഫിനൊപ്പം നിൽക്കുന്ന പാലായില്‍ ഇത്തവണ എല്‍ഡിഎഫ് ജയിക്കുമെന്നും കാനം പറഞ്ഞു. കഴിഞ്ഞ തവണ കെ.എം മാണിയുടെ ഭൂരിപക്ഷം കുറയ്ക്കാൻ സാധിച്ചത് ഈ തിരഞ്ഞെടുപ്പിൽ വിജയപ്രതീക്ഷ നൽകുന്നുണ്ട്. യോജിക്കാൻ കഴിയുന്നവരുമായി മാത്രം ഒരുമിക്കും എന്ന് വ്യക്തമാക്കിയ കാനം ആർക്കും കയറി വരാവുന്ന മുന്നണിയല്ല എൽ.ഡി.എഫ് എന്നും ഓർമ്മപ്പെടുത്തി.