കോട്ടയം: പൗരത്വ ഭേദഗതി നിയമത്തില്‍ ഗവർണർക്കെതിരെ ആഞ്ഞടിച്ച് കെ.മുരളീധരൻ എംപി. ആർ.എസ്.എസ് അജണ്ടയോടെ, ആർ.എസ്.എസിന്‍റെ ശൈലി കേരളത്തിൽ കൊണ്ടുവരാനാണ് ഗവർണർ ആരിഫ് മുഹമ്മദ് ഖാൻ ശ്രമിക്കുന്നതെന്നും അദ്ദേഹത്തിന്‍റെ പ്രതികരണങ്ങളും സമീപനവും ഇത് വ്യക്തമാക്കുന്നതാണെന്നും കെ.മുരളീധരൻ കോട്ടയത്ത് പറഞ്ഞു.
ജനവികാരം മനസിലാക്കാതെ നേർ വിപരീതമായാണ് ഗവർണറുടെ പ്രവർത്തനങ്ങളെന്നും ആരിഫ് മുഹമ്മദ് ഖാന് കേരളത്തിൽ പദവിയില്‍ തുടരാന്‍ അര്‍ഹതയില്ലെന്നും അദ്ദേഹം രാജിവയ്ക്കണമെന്നും കെ.മുരളീധരൻ വ്യക്തമാക്കി. ഗവർണറുടെ പരിധി വിട്ടുള്ള പ്രവർത്തനങ്ങളെ വിമർശിക്കാൻ മുഖ്യമന്ത്രിയും തയ്യറാവുന്നില്ല. സർക്കാരുമായ് ചേർന്നുള്ള യാതൊരു വിധ പ്രതിഷേധങ്ങൾക്കും ഇനിയില്ലെന്നും അദ്ദേഹം കൂട്ടിച്ചേര്‍ത്തു. പൗരത്വ ഭേദഗതി നിയമത്തിനെതിരായി നിയമസഭയിൽ പ്രമേയം പാസാക്കിയപ്പോൾ ഏക ബി.ജെ.പി എം.എൽ.എ കൂടിയായ ഒ.രാജഗോപാൽ എതിർക്കാതെ പ്രമേയം പാസാക്കാൻ മൗനസമ്മതം നൽകുകയായിരുന്നു. പൗരത്വ ബില്ലിൽ ബി.ജെ.പിക്കുള്ളിലുള്ള ഭിന്നതയാണ് ഇതിലൂടെ തെളിഞ്ഞതെന്നും അദ്ദേഹം വ്യക്തമാക്കി.