കോട്ടയത്ത് യുവാവിനെ വെട്ടിക്കൊന്ന ശേഷം അറുത്തുമാറ്റിയ കാൽ ജംഗ്ഷനില്‍ വച്ചു

ഗുണ്ടാസംഘങ്ങളുടെ കുടിപ്പകയാണ് കൊലപാതകത്തിന് പിന്നിലെന്ന് സൂചന

കോട്ടയം :കങ്ങഴ മുണ്ടത്താനത്ത് യുവാവിനെ വെട്ടിക്കൊന്ന ശേഷം കാല് അറുത്തുമാറ്റി പൊതുസ്ഥലത്ത് വച്ചു. മുണ്ടത്താനം വടക്കേറാട്ട് ചെളിക്കുഴി വാണിയപ്പുരയ്ക്കൽ തമ്പാൻ്റെ മകൻ മനേഷ് തമ്പാൻ (32) ആണ് കൊല്ലപ്പെട്ടത്. കൊലപാതകത്തിന് പിന്നിൽ ഗുണ്ടാസംഘങ്ങളുടെ കുടിപ്പകയെന്നാണ്‌ സൂചന.

വ്യാഴാഴ്‌ച ഉച്ചയ്ക്ക് രണ്ടുമണിയോടെ കാറിലെത്തിയ മുഖംമൂടി ധരിച്ച രണ്ടുപേർ അറുത്തുമാറ്റിയ കാൽ മുണ്ടത്താനം ഇടയപ്പാറ ജങ്ഷനിൽ വച്ചതോടെയാണ് നാടിനെ നടുക്കിയ സംഭവം പുറംലോകം അറിയുന്നത്. തുടർന്നുനടത്തിയ അന്വേഷത്തിൽ ഇടയപ്പാറ ജങ്ഷനിൽ നിന്നും ഒരു കിലോമീറ്റർ മാറി റബ്ബര്‍ തോട്ടത്തിൽ മൃതദേഹം കണ്ടെത്തുകയായിരുന്നു.

കൊല്ലപ്പെട്ട മനേഷ് ഗുണ്ടാസംഘത്തില്‍പ്പെട്ടയാളാണെന്നാണ് വിവരം. മൃതദേഹത്തിൽ നിരവധി വെട്ടുകളേറ്റ പാടുകളുണ്ട്. യുവാവിനെ വെട്ടി കൊലപ്പെടുത്തിയ ശേഷം വലതുകാൽമുറിച്ചുമാറ്റുകയായിരുന്നുവെന്ന് പൊലീസ് പറഞ്ഞു.

അതേസമയം കൊലപാതകവുമായി ബന്ധപ്പെട്ട് രണ്ടുപേർ മണിമല പൊലീസിൽ കീഴടങ്ങി. പൊലീസ് ഇവരെ ചോദ്യം ചെയ്തുവരികയാണ്. പ്രദേശത്ത് ഗുണ്ടാസംഘങ്ങളുടെ വിളയാട്ടവും കഞ്ചാവ് ഉൾപ്പടെയുള്ള ലഹരി വസ്തുക്കളുടെ വിൽപ്പനയും സജീവമാണെന്ന് നേരത്തേതന്നെ പരാതിയുണ്ടായിരുന്നു.