കോട്ടയം: കൊവിഡിന്‍റെ രണ്ടാം ഘട്ട വ്യാപനത്തിൽ ജില്ലയ്ക്ക് ആശ്വാസമേകാൻ കൊവിഡ് വാർ റൂം ഒരുങ്ങി. ജില്ല ആയൂർവേദ ആശുപത്രിയിൽ കൊവിഡ് രോഗികൾക്കായി സജ്ജമാക്കിയ കൊവിഡ് വാർ റൂം ജില്ല പഞ്ചായത്ത് പ്രസിഡന്‍റ് നിർമ്മല ജിമ്മി ഉദ്ഘാടനം ചെയ്തു. ആരോഗ്യം, വിദ്യാഭ്യാസം സ്റ്റാന്‍റിങ് കമ്മിറ്റി ചെയർപേഴ്‌സൺ പി.എസ് പുഷ്പമണിയുടെ അദ്ധ്യക്ഷതയിൽ കൂടിയ ഉദ്ഘാടന യോഗത്തിൽ വികസനകാര്യ സ്റ്റാന്‍റിങ് കമ്മിറ്റി ചെയർപേഴ്‌സൺ മഞ്ജു സുജിത്ത്, ആയൂർവേദ ഡിഎംഒ. ഡോ. സി.ജയശ്രീ, ആശുപത്രി സിഎംഒ. ആർ.വി. അജിത്ത്, ഡിഎസിആർസി കൺവീനർ ഡോ.ജുവൽ ജോസ് തുടങ്ങിയവർ പങ്കെടുത്തു.
ജില്ലയിലെ 71 പഞ്ചായത്തുകളിലും മുനിസിപ്പാലിറ്റികളിലുമായുള്ള 80 ആയുർവേദ ഡിസ്പെൻസറികൾ വഴി കൊവിഡാനന്തര ചികിത്സ നൽകുക എന്നതാണ് പദ്ധതിയുടെ ഉദ്ദേശം. കൊവിഡ് രോഗികൾക്കുള്ള ഔഷധം നൽകുന്ന ഭൈഷജ്യം പദ്ധതിയും കൊവിഡ് മുക്തരായവർക്കുള്ള ഔഷധങ്ങൾ നൽകുന്ന പുനർജനി പദ്ധതിയും വോളന്‍റിയർമാർ വഴിയും ആർടിടി വഴിയും വാർ റൂം വഴി എത്തിച്ചുകൊടുക്കുന്നു.