കോട്ടയം: വിദേശത്ത് നിന്നും മറ്റ് സംസ്ഥാനങ്ങളില്‍ നിന്നും എത്തുന്ന കൂടുതല്‍ പേര്‍ക്ക് കൊവിഡ്-19 സ്ഥിരീകരിക്കുന്ന സാഹചര്യത്തില്‍ കോട്ടയം ജില്ലയില്‍ രോഗ ചികിത്സാ സംവിധാനങ്ങള്‍ വിപുലീകരിക്കുന്നു. ആദ്യ ഘട്ടമെന്നോണം പാലാ ജനറല്‍ ആശുപത്രിയെ കൊവിഡ് ആശുപത്രികളുടെ പട്ടികയില്‍ ഉള്‍പ്പെടുത്തി. ആശുപത്രിയിലെ മറ്റ് ചികിത്സാ സംവിധാനങ്ങളെ ബാധിക്കാത്ത രീതിയില്‍ പ്രത്യേക ബ്ലോക്കിലാണ് കൊവിഡ് ചികിത്സയ്ക്ക് ക്രമീകരണം ഏര്‍പ്പെടുത്തിയിട്ടുള്ളത്.
നേരത്തെ, കോട്ടയം മെഡിക്കല്‍ കോളജ് ആശുപത്രിയും കോട്ടയം ജനറല്‍ ആശുപത്രിയുമായിരുന്നു ജില്ലയിലെ കൊവിഡ് ആശുപത്രികള്‍. പാലാ ജനറല്‍ ആശുപത്രിയിലെ പുതിയ കെട്ടിടത്തിലാണ് കൊവിഡ് വാര്‍ഡ് സജ്ജീകരിച്ചിരിക്കുന്നത്. രോഗം സ്ഥിരീകരിച്ചവരില്‍ ഒന്‍പതു പേരെ ഇവിടെ പ്രവേശിപ്പിച്ചു. ഏഴു നിലകളുള്ള കെട്ടിടത്തിലെ അഞ്ചും ആറും നിലകളിലാണ് നൂറു കിടക്കകളുള്ള കൊവിഡ് വാര്‍ഡുകള്‍ ഒരുക്കിയിട്ടുള്ളത്. ഈ വാര്‍ഡുകളിലേക്ക് ആവശ്യമുള്ള ഡോക്ടര്‍മാരെയും നഴ്സുമാരെയും നഴ്സിങ്ങ് അസിസ്റ്റന്‍റുമാരെയും പ്രത്യേകമായി നിയോഗിച്ചിട്ടുണ്ട്. വാര്‍ഡിനോടു ചേര്‍ന്ന് പ്രത്യേക ഐസിയുവും ഉടന്‍ സജ്ജമാകും.