കോട്ടയം : വൈക്കത്ത് ജോലി നഷ്‌ടപ്പെട്ട കെഎസ്ആർടിസി എം പാനൽ ജീവനക്കാരനും ഭാര്യയും ആത്മഹത്യ ചെയ്‌തു. ദമ്പതികളെ വീടിനുള്ളിലാണ് മരിച്ച നിലയിൽ കണ്ടെത്തിയത്. വൈക്കം മറവൻന്തുരുത്ത് സ്വദേശികളായ നടേശൻ, ഭാര്യ സിനിമോള്‍ എന്നിവരാണ് മരിച്ചത്.
ഇവർ കടുത്ത സാമ്പത്തിക ബുദ്ധിമുട്ടുകൾ നേരിട്ടിരുന്നുവെന്നാണ് പൊലീസ് പറയുന്നത്. മൂന്ന് വർഷം മുമ്പ് കെഎസ്‌ആര്‍ടിസിയില്‍ എം പാനല്‍ ജീവനക്കാരനായിരുന്നു നടേശൻ. ജോലിയില്‍ നിന്നും പിരിച്ചുവിടപ്പെട്ട ശേഷം കക്ക വാരല്‍ തൊഴിലാളിയായി ഉപജീവനം നടത്തുകയായിരുന്നു. മൃതദേഹങ്ങള്‍ ആശുപത്രിയിലേക്ക് മാറ്റി. പോസ്റ്റുമോര്‍ട്ടം നടപടികള്‍ക്ക് ശേഷം ബന്ധുക്കള്‍ക്ക് വിട്ടുകൊടുക്കും. ഇവര്‍ക്ക് രണ്ട് പെണ്‍മക്കളുണ്ട്. രണ്ട് പേരും സ്‌കൂള്‍ വിദ്യാര്‍ഥിനികളാണ്.
രണ്ടാം തവണയും നീറ്റ് വിജയിച്ചില്ല, അച്ഛനും മകനും ആത്മഹത്യ ചെയ്‌തു : നീറ്റ് പരീക്ഷ പാസാകാത്തതിൽ മനംനൊന്ത് മകനും അച്ഛനും ജീവനൊടുക്കി. ചെന്നൈ, ക്രോംപേട്ട് സ്വദേശിയായ എസ് ജഗദീശ്വരൻ, അച്ഛൻ സെൽവശേഖർ എന്നിവരാണ് മരിച്ചത്. തുടർച്ചയായ രണ്ടാം തവണയും നീറ്റ് പരീക്ഷയില്‍ തോറ്റതിന്‍റെ മനോവിഷമത്തിലാണ് ജഗദീശ്വരൻ ആത്മഹത്യ ചെയ്‌തത്. കഴിഞ്ഞ ശനിയാഴ്‌ചയാണ് ജഗദീശ്വരനെ വീടിനകത്ത് മരിച്ചനിലയിൽ കണ്ടെത്തിയത്.
മകന്‍റെ മരണത്തിൽ പിതാവ് മാനസികമായി തളർന്നിരുന്നു. തുടർന്ന് ഇന്നലെ രാവിലെയാണ് ആത്മഹത്യ ചെയ്‌തത്. സെൽവശേഖർ വിഷാദരോഗത്തിന് ചികിത്സയിലായിരുന്നുവെന്നാണ് ബന്ധുക്കൾ പറയുന്നു. നീറ്റ് റദ്ദാക്കണമെന്ന് ആവശ്യപ്പെട്ട് പിതാവ് മാധ്യമങ്ങളെ കണ്ടിരുന്നു. ഇതിന് ശേഷമാണ് ആത്മഹത്യ ചെയ്‌തത്.