മണിമലയാറ്റിൽ ചാടിയ വില്ലേജ് ഓഫീസറുടെ മൃതദേഹം കണ്ടെത്തി

മൂങ്ങാനിയിലെ തടയണയക്ക് സമീപത്ത് നിന്നാണ് മൃതദേഹം കിട്ടിയത്

കോട്ടയം:മണിമലയാറ്റിൽ ചാടിയ സ്പെഷ്യൽ വില്ലേജ് ഓഫീസറുടെ മൃതദേഹം കണ്ടെത്തി. മൂങ്ങാനിയിലെ തടയണയക്ക് സമീപത്ത് നിന്നാണ് മൃതദേഹം കിട്ടിയത്. കങ്ങഴ സ്വദേശി പ്രകാശ് തിങ്കളാഴ്ച്ച രാവിലെയാണ് മണിമലയാറ്റിൽ ചാടിയത്. ഈരാറ്റുപേട്ട നന്മകൂട്ടമാണ് മൃതദേഹം കണ്ടെടുത്തത്.

ആത്മഹത്യക്ക് കാരണം എന്തെന്ന് സൂചനകളില്ല. രണ്ടു ദിവസങ്ങളായി ഫയർഫോഴ്സും ദുരന്തനിവാരണ സേനയും ചേർന്ന് ആറ്റിൽ പരിശോധന നടത്തി വരുകയായിരുന്നു. തടയണകൾക്ക് സമീപത്ത് ഇന്നലെ രാത്രിമുതൽ കാവൽ ഏർപ്പെടുത്തിയിരുന്നു.

ചങ്ങനാശേരി താലൂക്ക് ഓഫിസിൽ സ്‌പെഷ്യൽ വില്ലേജ് ഓഫിസറായിരുന്നു. അടുത്തിടെയാണ് വില്ലേജ് ഓഫിസറായി സ്ഥാനക്കയറ്റം ലഭിച്ചത്. തിങ്കളാഴ്ച രാവിലെ പത്ത്‌ മണിയോടെയായിരുന്നു സംഭവം. ചങ്ങനാശേരിയിലെ ഓഫിസിലേയ്ക്കു പോകുന്നതിനായാണ് ഇദ്ദേഹം വീട്ടിൽ നിന്നും ഇറങ്ങിയത്.

തുടർന്ന്‌ മണിമല പാലത്തിൽ എത്തി ഇവിടെ ബാഗ് വച്ച ശേഷം ആറ്റിൽ ചാടുകയായിരുന്നു. ആറ്റിലേയ്ക്ക് ചാടുന്നത് കണ്ട് ഇതുവഴി എത്തിയ ഇതര സംസ്ഥാന തൊഴിലാളി ഇദ്ദേഹത്തെ രക്ഷിക്കാൻ ഒപ്പം ആറ്റിലേയ്ക്ക് ചാടി. എന്നാൽ കയ്യിൽ പിടുത്തം കിട്ടും മുൻപ് പ്രകാശൻ ആറ്റിലേയ്ക്ക് മുങ്ങിത്താഴുകയായിരുന്നു.

ബഹളം കേട്ട് നാട്ടുകാർ ഓടിക്കൂടിയതിനെ തുടർന്നാണ് പൊലീസ് സംഘം സ്ഥലത്ത് എത്തിയത്. തുടർന്ന് അഗ്നിരക്ഷാ സേനയുടെ സഹായത്തോടെ പ്രദേശത്ത് തിരച്ചിൽ ആരംഭിച്ചിരുന്നു. നേരത്തെ കൊവിഡ് ബാധിതനായിരുന്ന പ്രകാശ്‌ അടുത്തിടെയാണ് രോഗവിമുക്തനായത്.

ഇതേ മാനസിക ബുദ്ധിമുട്ടുകൾ അനുഭവിച്ചിരുന്നതായി സഹപ്രവർത്തകർ പറയുന്നു. ഇതേ തുടർന്നാവാം പ്രകാശ്‌ ആറ്റിൽ ചാടിയതെന്നു സംശയിക്കുന്നുണ്ട്. സംഭവത്തിൽ കേസെടുത്ത മണിമല പൊലീസ് അന്വേഷണം ആരംഭിച്ചിട്ടുണ്ട്.