കരുണയുടെ പ്രകാശം നിറച്ച് വലിയ ഇടയൻ വിടവാങ്ങി, കണ്ണീരോടെ യാത്രാ മൊഴി

കോട്ടയം ദേവലോകം അരമന ചാപ്പലില്‍ പൂർണ ഔദ്യോഗിക ബഹുമതികളോടെയാണ് സംസ്കാര ചടങ്ങുകൾ പൂർത്തിയായത്. സാമൂഹിക, സാംസ്കാരിക രംഗത്തെ നിരവധി പ്രമുഖർ ആദരാഞ്ജലി അർപ്പിക്കാനെത്തി.

കോട്ടയം: ഓർത്തോഡക്‌സ് സഭയുടെ വലിയ ഇടയന് വിശ്വാസ സമൂഹം വിടചൊല്ലി. കോട്ടയം ദേവലോകം അരമന ചാപ്പലിൽ പൂർണ ഔദ്യോഗിക ബഹുമതികളോടെയാണ് ഭൗതികശരീരം അടക്കം ചെയ്തത്. വൈകുന്നേരം അഞ്ചരയോടെയാണ് സംസ്‌കാര ചടങ്ങുകൾ പൂർത്തിയായത്.

ഉച്ചകഴിഞ്ഞ് 3 മണിയോടെ അവസാനിച്ച പൊതുദർശനത്തിന് ശേഷം പിതാക്കൻമാരുടെ നേതൃത്വത്തിൽ സംസ്ക്കാര ശൂശ്രൂഷ നടന്നു. അതിന് ശേഷം ബാവാമാരുടെ കബറിടത്തിന് അരികിലെത്തിച്ച ഭൗതിക ദേഹം പിതാക്കൻമാർ ശുശ്രൂഷകൾ പൂർത്തികരിച്ചശേഷം അടക്കം ചെയ്തു.

രാവിലെ അരമന ചാപ്പലിലെ കുർബാനക്ക് ശേഷം പൊതു ദർശനത്തിനു വച്ച ബാവയുടെ ഭൗതിക ശരീരം ദർശിക്കാൻ മന്ത്രിമാരും ജനപ്രതിനിധികളും വിശ്വാസികളുo ഒഴുകിയെത്തി. മന്ത്രിമാരായ വീണ ജോർജ്, വി എൻ വാസവൻ, മുൻ മന്ത്രിമാരായ എ സി മൊയ്തിൻ, തിലോത്തമൻ, ഉമ്മൻ ചാണ്ടി, തിരുവഞ്ചൂർ രാധാകൃഷ്ണൻ, സിപിഐ നേടാവ് പന്ന്യൻ രവീന്ദ്രൻ, പി സി ജോർജ് തുടങ്ങിയവർ അന്ത്യാഞ്ജലി അർപ്പിച്ചു.

കൂടാതെ വിവിധ സഭ മേലധ്യക്ഷൻമാരും പുരോഹിതൻമാരും നൂറുകണക്കിനു വിശ്വാസികളും ആദരാഞ്ജലി അർപ്പിക്കാനെത്തി. ദേവാലയത്തിന് പുറത്ത് ആളുകൾക്ക് അകലം പാലിച്ചു നിൽക്കാനുള്ള സൗകര്യവും ഒരുക്കിയിരുന്നു.

തിങ്കളാഴ്ച്ച പുലർച്ചെ പരുമലയിലെ ആശുപത്രിയിൽ വച്ചായിരുന്നു ബാവ കാലം ചെയ്തത്. അർബുദ ബാധിതനായി ചികിത്സയിലായിരുന്നു. ചികിത്സക്കിടെ ബാധിച്ച കൊവിഡ് ഭേദമായിരുന്നെങ്കിലും പിന്നീട് ആരോഗ്യ സ്ഥിതി വഷളാവുകയായിരുന്നു.