കോട്ടയം: ചങ്ങനാശ്ശേരിയിൽ ആംബുലൻസ് നിയന്ത്രണം വിട്ട് റോഡരികിലെ മതിലിൽ ഇടിച്ചു. എംസി റോഡിൽ ചങ്ങനാശേരി പാലാത്ര ജംഗ്ഷനു സമീപം ഇന്നലെ രാത്രി 10 മണിയോടെ ആയിരുന്നു അപകടം. പത്തനംതിട്ടയിൽ നിന്ന് രോഗിയുമായി എത്തിയ ആംബുലൻസാണ് നിയന്ത്രണം വിട്ട് റോഡരികിലെ മതിലിൽ ഇടിച്ചത്.
രോഗിയെ കോട്ടയം മെഡിക്കൽ കോളജിലേക്ക് കൊണ്ടുപോകുന്നതിനിടെയായിരുന്നു അപകടം. മുൻപിൽ സഞ്ചരിച്ച കാറിനെ മറികടക്കാനുള്ള ശ്രമത്തിനിടയിൽ ആംബുലൻസിന്‍റെ നിയന്ത്രണം നഷ്‌ടമായി അപകടം നടന്നുവെന്നാണ് ചങ്ങനാശേരി പൊലീസിന്‍റെ നിഗമനം. രോഗിയെ മറ്റൊരു ആംബുലൻസിൽ കയറ്റി കോട്ടയം മെഡിക്കൽ കോളജിലേക്ക് കൊണ്ടു പോയി.
കോട്ടയം ഭാഗത്തേക്ക് വന്ന കാറിലും, സമീപത്തെ പെട്ടിക്കടയിലും, പാർക്ക് ചെയ്‌തിരുന്ന വാഹനങ്ങളിലും ഇടിച്ച ശേഷമാണ് ആംബുലൻസ് മതിലിൽ ഇടിച്ചത്. സംഭവത്തില്‍ കാറുകൾക്ക് കേടുപാട് സംഭവിച്ചു. പരിക്കേറ്റ കാർ യാത്രികർ സമീപത്തെ ആശുപത്രിയിൽ ചികിത്സ തേടി.