കോട്ടയം: ശക്തമായ മഴയില്‍ വീടിന്‍റെ സംരക്ഷണ ഭിത്തി തകർന്നു. തീക്കോയി മംഗളഗിരി ചൂണ്ടി ഭാഗത്ത് ആറ്റുപുറമ്പോക്കില്‍ കഴിയുന്ന പുതുവീട്ടില്‍ വീനിഷീന്‍റെ സംരക്ഷണഭിത്തിയാണ് തകർന്നത്. മഴ തുടരുമെന്ന വാര്‍ത്തകള്‍ക്കിടയില്‍ എങ്ങോട്ട് പോകുമെന്ന വിഷമ സന്ധിയിലാണ് വൃദ്ധമാതാവും കുട്ടികളുമടങ്ങുന്ന ആറംഗകുടുംബം. മീനച്ചിലാറിന്‍റെ തീരത്തെ ആറ്റുപുറമ്പോക്കിലാണ് വര്‍ഷങ്ങളായി വിനീഷിന്‍റേതടക്കം 20-ലധികം കുടുംബങ്ങള്‍ കഴിയുന്നത്. ആറിനോട് തൊട്ടുചേര്‍ന്നുള്ള വീടിന്‍റെ കെട്ട് ഇടിഞ്ഞതിനൊപ്പം മുറ്റം വീണ്ടുകീറുകയും ചെയ്തതോടെ വീട് തകര്‍ച്ചാഭീഷണി നേരിടുകയാണ്. വിനീഷും ഭാര്യയും ഭാര്യയുടെ മാതാവും മൂന്ന് കുട്ടികളുമടങ്ങുന്ന കുടുംബമാണ് ഈ വീട്ടില്‍ കഴിയുന്നത്.
ശക്തമായ മഴയില്‍ മീനച്ചിലാറിന്‍റെ തീരത്ത് ഭീതിയോടെ ഒരു കുടുംബം