കോട്ടയത്ത് 16 പേർക്ക് കൂടി കൊവിഡ് സ്ഥിരീകരിച്ചു

രണ്ട് ആരോഗ്യ പ്രവർത്തകർ ഉൾപ്പെടെ മൂന്ന് പേർക്കാണ് സമ്പർക്കത്തിലൂടെ വൈറസ് ബാധ സ്ഥിരീകരിച്ചത്.

കോട്ടയം: ജില്ലയിൽ പുതുതായി 16 പേർക്കു കൂടി വൈറസ് ബാധ സ്ഥിരീകരിച്ചു. വിദേശത്തു നിന്നെത്തിയ ആറു പേരും ഇതര സംസ്ഥാനങ്ങളിൽ നിന്നെത്തിയ ഏഴ് പേരും രോഗബാധ സ്ഥിരീകരിച്ചവരിൽ ഉൾപ്പെടുന്നു. രണ്ട് ആരോഗ്യ പ്രവർത്തകർ ഉൾപ്പെടെ മൂന്ന് പേർക്കാണ് സമ്പർക്കത്തിലൂടെ വൈറസ് ബാധ സ്ഥിരീകരിച്ചത്. ചങ്ങനാശ്ശേരി മത്സ്യ മാർക്കറ്റിലെ ജീവനക്കാരനായ വെട്ടിത്തുരുത്ത് സ്വദേശിയായ 46കാരന് രോഗം സ്ഥിരീകരിച്ചു. ഇയാളുടെ സമ്പർക്ക പശ്ചാത്തലം വ്യക്തമല്ല. രോഗ വ്യാപന സാധ്യത കണക്കിലെടുത്ത് ചങ്ങനാശ്ശേരി മത്സ്യ മാർക്കറ്റ് അടച്ചു.

കുറുപ്പന്തറ കുടുംബാരോഗൃകേന്ദ്രത്തിലെ ജീവനക്കാരായ രണ്ട് ആരോഗ്യ പ്രവർത്തകർക്ക് സമ്പർക്കത്തിലൂടെ രോഗം സ്ഥിരീകരിച്ചിട്ടുണ്ട്. കഴിഞ്ഞ ദിവസം രോഗം സ്ഥിരീകരിച്ച ഇതേ ആശുപത്രിയിലെ ജീവനക്കാരുടെ സമ്പർക്കപ്പട്ടികയിൽ ഇവരും ഉണ്ടായിരുന്നു. രോഗം സ്ഥിരീകരിച്ച് ചികത്സയിലുണ്ടായിരുന്ന ആറ് പേർ വൈറസ് മുക്തി നേടി. ഇതോടെ കോട്ടയം ജില്ലയിൽ ചികിത്സയിലുള്ളവരുടെ എണ്ണം 228 ആയി.