വനമിത്ര പുരസ്ക്കാരം പരിസ്ഥിതി പ്രവർത്തകൻ വി.കെ മധുസൂദനന്

ജൈവ വൈവിധ്യ സംരക്ഷണ രംഗത്തെ മികവിന് സംസ്ഥാന വനംവകുപ്പ് നൽകുന്ന പുരസ്‌കാരമാണിത്.

കൊല്ലം: പരിസ്ഥിതി പ്രവർത്തകൻ വി.കെ മധുസൂദനന് വനമിത്ര പുരസ്ക്കാരം. ജൈവ വൈവിധ്യ സംരക്ഷണ രംഗത്തെ മികവിന് സംസ്ഥാനവനംവകുപ്പ് നൽകുന്ന പുരസ്‌കാരമാണിത്. 25000 രൂപയും പ്രശംസി പത്രവുമടങ്ങുന്നതാണ് പുരസ്‌കാരം.വനദിനമായ മാർച്ച് 21ന് പുരസ്‌കാരം സമ്മാനിക്കും.

കഴിഞ്ഞ അരനൂറ്റാണ്ടായി പരിസ്ഥിതി രംഗത്ത് പ്രവർത്തിക്കുന്ന മധുസൂദനൻ പരിഷത്ത് സംസ്ഥാന സമിതിയംഗം, ജൈവ വൈവിധ്യ ബോർഡ് വിദഗ്ധ സമിതിയംഗം, ജില്ലാ പരിസര കൺവീനർ തുടങ്ങി പരിസ്ഥിതി സംരക്ഷണ പ്രവർത്തന മേഖലയിലാണ് പ്രവർത്തിക്കുന്നത്. മധുസൂദനന്‍റെ നിരവധി കണ്ടെത്തലുകളും ഏറെ ശ്രദ്ധേയമാണ്. ആഗോള താപനത്തിന്‍റെ ഫലമായുള്ള കടൽക്കയറ്റമാണ് മൺട്രോ തുരുത്തിന്‍റെ ജലസമാധിക്ക് കാരണമെന്ന് നീണ്ട പഠനത്തിലൂടെ കണ്ടെത്തിയ മധുസൂദനന്‍, 1850 നു ശേഷം വംശനാശം വന്നുവെന്ന് കരുതിയ മഞ്ഞ കണ്ടൽ എന്ന അപൂർവ്വയിനം കണ്ടൽ നീണ്ടകരയിൽ കണ്ടെത്തിയിരുന്നു . കൂടാതെ സ്വന്തമായി നട്ടു വളർത്തുന്ന ചില്ല കണ്ടൽ വർക്കലയിലും, പാതിരാമണലിലുമുണ്ട്.

ജൈവകൃഷി, മാലിന്യ സംസ്‌കരണ പ്രവർത്തനങ്ങൾ, വൃക്ഷവൽക്കരണം, കാവ് വളർത്തൽ, കുളം ,വന്യ ജീവി സംരക്ഷണം എന്നിവയും മധുസൂദനന്‍ നടത്തി വരുന്നു. ഒരു കാവ് 20 വർഷമായി വളർത്തി സംരക്ഷിക്കുന്ന മധുസൂദനൻ ഒപ്പം ഒരു കുളവും, നൂറിലധികം ആമകളേയും സംരക്ഷിക്കുന്നു. കോസ്റ്റൽ പൊലീസിന്‍റെ നേതൃത്വത്തിൽ നീണ്ടകര അഴിമുഖത്ത് 6000 കണ്ടൽ തൈകൾ വച്ചുപിടിപ്പിച്ചു. പരിസ്ഥിതി മേഖലയിൽ നിരവധി പ്രവർത്തനങ്ങൾ ഏറ്റെടുക്കുന്ന വി കെ മധുസൂദനന് ലഭിച്ച അംഗീകാരത്തിൽ വീട്ടുകാർക്കൊപ്പം നാടും സന്തോഷിക്കുകയാണ്.