മുതിർന്ന സിപിഐ നേതാവും മുൻ കരുനാഗപ്പള്ളി എംഎല്‍എയുമായ ആർ രാമചന്ദ്രൻ അന്തരിച്ചു

കൊല്ലം ജില്ലയിലെ സിപിഐയുടെ മുതിർന്ന നേതാവ് ആർ രാമചന്ദ്രൻ അന്തരിച്ചു. മുൻ കരുനാഗപ്പള്ളി എംഎല്‍എയും മുൻ കൊല്ലം ജില്ല പഞ്ചായത്ത് വൈസ് പ്രസിഡന്‍റുമാണ്.

കൊല്ലം: സിപിഐ സംസ്ഥാന കൗൺസില്‍ അംഗവും മുൻ കരുനാഗപ്പള്ളി എംഎല്‍എയുമായ ആർ രാമചന്ദ്രൻ അന്തരിച്ചു. 75 വയസായിരുന്നു. കരൾ രോഗത്തെ തുടർന്ന് ചികിത്സയിലായിരിക്കെയാണ് അന്ത്യം. ഒന്നാം പിണറായി സർക്കാരിന്‍റെ സമയത്ത് ( 2016-2021) കരുനാഗപ്പള്ളി നിയോജക മണ്ഡലത്തെ നിയമസഭയില്‍ പ്രതിനിധീകരിച്ചു. 2021ല്‍ വീണ്ടും മത്സരിച്ചെങ്കിലും പരാജയപ്പെട്ടു.

സിപിഐ സംസ്ഥാന കൗൺസില്‍ അംഗമായിരുന്ന ആർ രാമചന്ദ്രൻ സിഡ്‌കോ ചെയർമാനായും കൊല്ലം ജില്ല പഞ്ചായത്ത് വൈസ് പ്രസിഡന്‍റായും പ്രവർത്തിച്ചിട്ടുണ്ട്. വിദ്യാർഥി രാഷ്ട്രീയത്തിലൂടെയാണ് പൊതുപ്രവർത്തനം തുടങ്ങിയത്. 2012ല്‍ സിപിഐ കൊല്ലം ജില്ല സെക്രട്ടറിയായി. കൊല്ലം ജില്ലയിലെ സിപിഐയുടെ മുതിർന്ന നേതാവായിരുന്നു.

ഭാര്യ: പ്രിയദർശിനി. മകൾ: ദീപ രാമചന്ദ്രൻ.