പുറ്റിങ്ങല്‍ വെടിക്കെട്ട് അപകടം : വിചാരണ ഈ മാസം 29 ന് തുടങ്ങും

പുറ്റിങ്ങല്‍ ക്ഷേത്രത്തിൽ വെടിക്കെട്ട് അപകടമുണ്ടായത് 2016 ഏപ്രിൽ 10ന്‌ പുലർച്ചെ

കൊല്ലം : പുറ്റിങ്ങല്‍ വെടിക്കെട്ട് അപകട ദുരന്ത കേസിന്‍റെ വിചാരണ ഈ മാസം 29 ന് തുടങ്ങും. 52 പ്രതികൾക്ക് കൊല്ലം പരവൂർ ഒന്നാം ക്ലാസ് മജിസ്ട്രേറ്റ് കോടതി സമൻസ് അയച്ചു. 110 പേര്‍ക്ക് മരണവും 750 പേർക്ക് പരിക്കും സംഭവിച്ച കേസിലാണ് ഈ മാസം 29ന് വിചാരണ തുടങ്ങുന്നത്.

ഹാജരാകുന്ന പ്രതികൾക്ക് 29 ന് കുറ്റപത്രത്തിന്റെ ഡിജിറ്റൽ പകർപ്പ് നൽകും. ആകെ 59 പ്രതികളിൽ 7 പേർ മരിച്ചു. 450 തൊണ്ടി മുതലുകളും 1678 സാക്ഷികളും 1800 ഓളം രേഖകളും ഉൾപ്പെടുന്നതാണ് കുറ്റപത്രം. ക്രൈംബ്രാഞ്ച് എസ്‌പി ഷാജഹാനാണ് കുറ്റപത്രം സമർപ്പിച്ചത്.

2016 ഏപ്രിൽ 10ന്‌ പുലർച്ചെയാണ് പുറ്റിങ്ങല്‍ ക്ഷേത്രത്തിൽ വെടിക്കെട്ട് അപകടമുണ്ടായത്. 110 പേരുടെ മരണത്തിന് ഇടയാക്കിയ അപകടത്തിൽ നൂറുകണക്കിന് വീടുകളും കിണറുകളും പൂർണമായും ഭാഗികമായും നശിച്ചിരുന്നു.