കൊല്ലം പരവൂരിൽ വൻ കവർച്ച

ആളില്ലാത്ത വീട് കുത്തി തുറന്ന് 50 പവൻ കവർന്നു.

കൊല്ലം: പരവൂരിൽ ആളില്ലാത്ത വീട് കുത്തിത്തുറന്ന് വൻ കവർച്ച. 50 പവന്‍റെ സ്വർണാഭരണങ്ങളും അരലക്ഷം രൂപയും കവർന്നു. പരവൂർ ദയാബ്ജി ജംഗ്ഷൻ അനിത ഭവനിൽ മോഹൻലാലിന്‍റെ വീട്ടിലാണ് കവർച്ച നടന്നത്. ശസ്ത്രക്രിയക്കായി കുടുംബാംഗങ്ങളോടൊപ്പം തിരുവനനന്തപുരത്തെ സ്വകാര്യ ആശുപത്രിയിലാണ് മോഹൻലാൽ. മകൻ ഗിരീഷ് ലാൽ ഇന്നു രാവിലെ വീട്ടിലെത്തിയപ്പോഴാണ് മോഷണ വിവരം അറിയുന്നത്.

മുൻവശത്തെ വാതിൽ കുത്തിത്തുറന്ന മോഷ്ടാക്കൾ കോടാലി ഉപയോഗിച്ച് അലമാര വെട്ടിപ്പൊളിച്ചാണ് സ്വർണവും പണവും കവർന്നത്. കോടാലി വീട്ടിൽ നിന്നും കണ്ടെടുത്തു. പൊലീസും ഫൊറൻസിക് വിദഗ്ധരും സ്ഥലത്തെത്തി പരിശോധന നടത്തി.