കൊല്ലം :സംസ്ഥാനത്തെ എല്ലാ സപ്ലൈകോ വിപണന കേന്ദ്രങ്ങളിലും കശുവണ്ടി ഉത്പന്നങ്ങള്‍ ലഭ്യമാക്കുമെന്ന് ഭക്ഷ്യ പൊതുവിതരണ വകുപ്പ് മന്ത്രി ജി ആര്‍ അനില്‍. ഗുണമേന്മയുള്ള ഉത്പന്നങ്ങള്‍ ഉറപ്പാക്കുന്നതിനോടൊപ്പം നിലവിലെ പ്രതിസന്ധിക്ക് കൈത്താങ്ങാകുന്നതിനാണ് കശുവണ്ടി വികസന കോര്‍പ്പറേഷന്‍റെയും കാപെക്‌സിന്‍റെയും ഉത്പന്നങ്ങള്‍ക്ക് സര്‍ക്കാര്‍ വിപണി ഉറപ്പാക്കുന്നതെന്ന് മന്ത്രി പറഞ്ഞു. കാപക്‌സിന്‍റെ കൊല്ലം പെരുമ്പുഴ കശുവണ്ടി ഫാക്‌ടറി സന്ദര്‍ശിക്കുകയായിരുന്നു മന്ത്രി.
വിവിധ പൊതുമേഖലാ സ്ഥാപനങ്ങളുടെ നിലനില്‍പ്പ് കൂടി കണക്കിലെടുത്താണ് കശുവണ്ടി, നെയ്യ്, ഏലയ്ക്ക തുടങ്ങിയ ഉത്പന്നങ്ങള്‍ സര്‍ക്കാരിന്‍റെ ഓണ കിറ്റില്‍ ഉള്‍പ്പെടുത്താന്‍ തീരുമാനിച്ചത്. കൃത്യസമയത്ത് എല്ലാവരിലേക്കും ഓണക്കിറ്റ് എത്തിക്കും. കഴിഞ്ഞ ദിവസം മാത്രം സംസ്ഥാനത്ത് 983572 കിറ്റുകളാണ് നല്‍കിയതെന്നും ആഭ്യന്തര വിപണിയില്‍ ഇടപെടല്‍ നടത്തിയാല്‍ പ്രതിസന്ധിയിലും പിടിച്ചുനില്‍ക്കാനാകുമെന്നും മന്ത്രി പറഞ്ഞു.