കാസർകോട്: അഭിപ്രായ ഭിന്നതകള്‍ക്കും തര്‍ക്കങ്ങള്‍ക്കും ഒടുവില്‍ മഞ്ചേശ്വരത്ത് സ്ഥാനാര്‍ഥിയായി സിപിഎം ജില്ലാ കമ്മിറ്റിയംഗം വി.വി രമേശൻ നിയോഗിക്കപ്പെട്ടു. ഭാഷാ ന്യൂനപക്ഷങ്ങള്‍ക്ക് വളരെ സ്വാധീനമുള്ള മണ്ഡലത്തിലാണ് കാഞ്ഞങ്ങാട് സ്വദേശിയായ വി.വി രമേശന് ജനവിധി തേടുന്നത്. സംസ്ഥാനത്തെ മറ്റു മണ്ഡലങ്ങളില്‍ സിപിഎം സ്ഥാനാര്‍ഥികളെ പ്രഖ്യാപിക്കുമ്പോഴും ഒരു പേരിലേക്ക് എത്താന്‍ ജില്ലാ നേതൃത്വത്തിന് കഴിയാതെ വന്നതോടെയാണ് കേരളത്തിന്‍റെ വടക്കേ അറ്റത്തുള്ള മഞ്ചേശ്വരം മണ്ഡലത്തെ ഒഴിച്ചിട്ടത്.
സിപിഎം മണ്ഡലം കമ്മിറ്റി യോഗത്തില്‍ പല പേരുകളും വന്നിരുന്നെങ്കിലും ചര്‍ച്ചകളിൽ വിമര്‍ശനങ്ങളും ഭിന്നാഭിപ്രായങ്ങളും ഉയർന്നു. ജില്ലാ സെക്രട്ടേറിയറ്റംഗം കെ.ആര്‍ ജയാനന്ദക്കായിരുന്നു ജില്ലാ നേതൃത്വം പ്രഥമ പരിഗണന നല്‍കിയത്. എന്നാല്‍ മണ്ഡലം കമ്മിറ്റിയില്‍ ഭൂരിപക്ഷവും എതിര്‍പ്പ് അറിയിച്ചതോടെ ജില്ലാ നേതൃത്വവും പ്രതിസന്ധിയിലായി. തുടര്‍ന്ന് വീണ്ടും മണ്ഡലം കമ്മിറ്റി ചേര്‍ന്നെങ്കിലും തീരുമാനമെടുക്കാന്‍ ജില്ലാ സെക്രട്ടേറിയറ്റിനെ ചുമതലപ്പെടുത്തി.