പുരവഞ്ചിയെ വെല്ലുന്ന ചങ്ങാടം; ന്യൂജനറേഷൻ ചങ്ങാടമൊരുക്കി ഇരട്ട സഹോദരങ്ങൾ

നെല്ലിക്കട്ടയിലെ ഡ്രൈവർ ബാലകൃഷ്‌ണന്‍റെയും ഗീതയുടെയും മക്കളായ ആദർശും, ആകാശുമാണ് മുളകൊണ്ടുള്ള പുത്തൻ ചങ്ങാടം നിർമിച്ചത്.

കാസർകോട്‌:വാഴയും കവുങ്ങും കൊണ്ടുള്ള പഴഞ്ചൻ ചങ്ങാടങ്ങൾക്ക് വിട. കാസർകോട് എത്തിയാൽ ന്യൂ ജനറേഷൻ ചങ്ങാടം കാണാം. പുരവഞ്ചിയെ വെല്ലുന്ന ചങ്ങാടം ഉണ്ടാക്കി ശ്രദ്ധനേടുകയാണ് ഇരട്ട സഹോദരങ്ങൾ.

മല്ലം മുണ്ടപ്പള്ളം സ്വദേശികളും പ്ലസ് വൺ വിദ്യാർഥികളുമായ ആദർശും, ആകാശുമാണ് ഒരേസമയം പത്തുപേർക്കുവരെ സഞ്ചാരിക്കാവുന്ന മുളകൊണ്ടുള്ള ചങ്ങാടം ഒരുക്കിയത്. മധുവാഹിനിപ്പുഴയിലെ ഈ ചങ്ങാടം ആരെയും ആകർഷിക്കുന്നതാണ്. അഞ്ചുമീറ്റർ നീളവും നാലുമീറ്റർ വീതിയുമുള്ള ചങ്ങാടത്തിന്‍റെ നിർമാണം സ്‌കൂൾ അവധി ദിവസങ്ങളിലാണ്‌ ഇവർ പൂർത്തീകരിച്ചത്.

ഒരു മാസം കൊണ്ടാണ് പണി പൂർത്തീകരിച്ചത്. വെട്ടിയെടുത്ത മുള, നട്ടും ബോൾട്ടുമുപയോഗിച്ചാണ്‌ ഘടിപ്പിച്ചു. അതിനുതാഴെ 20 ലിറ്റർ വെള്ളം ഉൾകൊള്ളുന്ന 20 പ്ലാസ്‌റ്റിക്‌ ബോട്ടിലുകളും വലിയ പ്ലാസ്‌റ്റിക്‌ കന്നാസുകളും കെട്ടിവച്ചു. മുള ഈർന്നാണ്‌ മാടും ചുമരും നിർമിച്ചത്‌.

വാഴത്തടയും കവുങ്ങിൻ കഷണവും ഉപയോഗിച്ചാണ്‌ ആദ്യ ചങ്ങാടം നിർമിച്ചത്‌. എല്ലാവർഷവും വാഴ തണ്ട് കൊണ്ട് ചങ്ങാടം നിർമ്മിക്കാറുണ്ട്. പുഴയുടെ ഇരുവശമുള്ള പറമ്പിലെ തേങ്ങയും അടക്കയും ശേഖരിക്കാൻ പ്രദേശവാസികൾ ആശ്രയിക്കുന്നത് ഈ ചങ്ങാടം ആയിരുന്നു.

എന്നാൽ വാഴത്തണ്ട് കൊണ്ട് പുഴയിൽ ചങ്ങാടം ഉണ്ടാക്കിയപ്പോൾ ഇത് വലിയ അപകടമാണെന്ന് പറഞ്ഞ് പലരും പേടിപ്പിച്ചു. പിന്നീടാണ് സുരക്ഷിതമായ ചങ്ങാടം ഉണ്ടാക്കാൻ തീരുമാനിച്ചത്.

മല്ലം മുണ്ടപ്പള്ളത്ത്‌ തടയണ നിർമിച്ചതിനാൽ മധുവാഹിനിപ്പുഴയിൽ രണ്ടാൾ പൊക്കത്തിൽ വെള്ളമുണ്ട്‌. സുരക്ഷിതമായ ചങ്ങാടം ഒരുക്കിയതോടെ പ്രദേശവാസികൾക്കും ഏറെ ഗുണമാണ്. നെല്ലിക്കട്ടയിലെ ഡ്രൈവർ ബാലകൃഷ്‌ണന്‍റെയും ഗീതയുടെയും മക്കളാണ്‌ ഈ മിടുക്കന്മാർ. ആദർശ്‌ ചെർക്കള ജിഎച്ച്‌എസിലും ആകാശ്‌ എടനീർ ജിഎസ്‌എച്ച്‌എസിലുമാണ് പഠിക്കുന്നത്.