നാടക കാണികൾക്ക് സ്നേഹ സദ്യ വിളമ്പി വെള്ളിക്കോത്തുകാർ

കലോത്സവ സംഘാടക സമിതിയുടെ ഭക്ഷണശാലയായ സബർമതിയിൽ നിന്നും കിലോമീറ്ററുകൾ അകലെയാണ് നാടക മത്സരവേദി. നാടകം കാണാനെത്തുവർക്കും മത്സരാർത്ഥികൾക്കും ബുദ്ധിമുട്ടായതോടെയാണ് സദ്യ നല്‍കാൻ നാട്ടുകാർ തീരുമാനിച്ചത്.

കാസർകോട്:നാടക മത്സരം വീക്ഷിക്കാൻ എത്തിയവർക്ക് ഉച്ച ഭക്ഷണം വിതരണം ചെയ്ത് നാട്ടുകാർ. പ്രധാന വേദിയിൽ നിന്നും കിലോമീറ്റർ അകലെയുള്ള നാടകവേദിക്ക് സമീപമാണ് വെള്ളിക്കോത്തുകാർ സദ്യയൊരുക്കി നൽകിയത്.
വെള്ളിക്കോത്തുക്കാരുടെ സ്നേഹമാണ് ഈ ഭക്ഷണശാലയിൽ വിളമ്പുന്നത്. പായസം അടക്കം 10 വിഭവങ്ങൾ അടങ്ങിയ സ്വാദൂറും സദ്യയാണ് കാണികൾക്കായി നല്‍കുന്നത്. വെള്ളിക്കോത്ത് പി.സ്മാരക ഹയർ സെക്കൻഡറി സ്കൂൾ നാടകവേദിക്ക് സമീപത്താണ് നാട്ടുകാർ സദ്യ വിളമ്പിയത്.

കലോത്സവ സംഘാടക സമിതിയുടെ ഭക്ഷണശാലയായ സബർമതിയിൽ നിന്നും കിലോമീറ്ററുകൾ അകലെയാണ് നാടക മത്സരവേദി. മത്സരാർത്ഥികൾക്കും അധ്യാപകർക്കും പുറമേ ആയിരക്കണക്കിന് ആളുകളാണ്‌ നാടക മത്സരങ്ങൾക്ക് പ്രേക്ഷകരായെത്തിയത്. കഴിഞ്ഞ രണ്ടു ദിവസവും ഭക്ഷണം കിട്ടാതെ കാണികൾ വലഞ്ഞതോടെയാണ് സദ്യയൊരുക്കാൻ നാട്ടുകാർ കൂട്ടായി തീരുമാനമെടുത്തത്. വേദിക്ക് സമീപം തന്നെ ഉച്ചഭക്ഷണം ഒരുക്കിയപ്പോൾ അത് മത്സരാർത്ഥികൾക്കും ഒപ്പം കാണികൾക്കും ആശ്വാസമായി. വിവിധ ക്ലബുകളും സന്നദ്ധ സംഘടനകളും കുടുംബശ്രീ പ്രവർത്തകരും നാട്ടുകാരും ഒരു മനസ്സോടെ കൈകോർതാണ് ഭക്ഷണ വിതരണം നടത്തിയത്. 5000ലേറെ പേർക്കാണ് വെള്ളിക്കോത്തെ ഭക്ഷണ ശാലയിൽ സദ്യ നൽകിയത്.