'ബ്രേക്ക് ദി ചെയ്‌ന്‍' ആശയം യക്ഷഗാന പാവകളിയിലൂടെ പൊതുസമൂഹത്തിലേക്ക്

വൈദ്യശാസ്ത്രത്തിൻ്റെ ദൈവമെന്ന് പുരാണങ്ങളിൽ അറിയപ്പെടുന്ന ധന്വന്തരിയെയും കൊറോണാസുരനെയും കഥാപാത്രങ്ങളാക്കിയാണ് കൊറോണ യക്ഷ ജാഗ്രതിയുടെ ആവിഷ്കാരം.

കാസര്‍കോട്‌: കൊവിഡ് ബോധവൽക്കരണത്തിന് യക്ഷഗാന ബൊമ്മയാട്ടത്തെ ഉപയോഗപ്പെടുത്തുകയാണ് കാസർകോട്ടെ ഒരു കൂട്ടം കലാകാരൻമാർ. ബ്രേക്ക് ദി ചെയ്ൻ ആശയം പാവകളിയിലൂടെ ജനങ്ങളിലേക്കെത്തിക്കുമ്പോൾ പുരാണ കഥകൾ മാത്രം പറഞ്ഞിരുന്ന യക്ഷഗാന പാവകളി സാമൂഹ്യബോധവൽക്കരണത്തിലേക്ക് വഴിമാറുകയാണിവിടെ. കാണികളെ ഏറെ ആകർഷിക്കുന്ന കലാരൂപത്തിലൂടെ കൊവിഡിനെതിരായ ജാഗ്രതയെ ഓർമ്മപ്പെടുത്തുകയാണ് യക്ഷഗാന ബൊമ്മയാട്ടത്തിൽ പ്രശസ്തനായ കാസർകോട് പുലിക്കുന്നിലെ എ.വി.രമേഷും സംഘവും. വൈദ്യശാസ്ത്രത്തിൻ്റെ ദൈവമെന്ന് പുരാണങ്ങളിൽ അറിയപ്പെടുന്ന ധന്വന്തരിയെയും കൊറോണാസുരനെയും കഥാപാത്രങ്ങളാക്കിയാണ് കൊറോണ യക്ഷ ജാഗ്രതിയുടെ ആവിഷ്കാരം.

യക്ഷഗാനത്തിൻ്റെ തെക്കൻ ശൈലിയിലുള്ള സംഭാഷണ ഭാഗവതാവതരണമാണ് പാവകളിയിൽ. കൊറോണാസുരൻ്റെ വരവിൽ ഭയന്ന ജനങ്ങളെ രക്ഷിക്കാനുള്ള ദൗത്യം ധന്വന്തരി ഏറ്റെടുക്കുന്നതും ജനങ്ങൾക്ക് നൽകുന്ന ഉപദേശങ്ങളുമാണ് പാവകളിയിലൂടെ പറയുന്നത്. നൂലിൽ കെട്ടിയിറക്കിയ പാവകളെ കൈയടക്കത്തോടെ ചലിപ്പിക്കുന്നത് ഈ മേഖലയിലെ പ്രശസ്തനായ പുലിക്കുന്നിലെ എ.വി.രമേഷാണ്. അദ്ദേഹം തന്നെയാണ് ഇതിനുള്ള പാവകളെയും നിർമിച്ചത്‌. മൂന്ന് പതിറ്റാണ്ടായി യക്ഷഗാന ഭാഗവതരംഗത്തുള്ള രാമകൃഷ്ണമയ്യയുമായി ചേർന്നാണ് രമേഷ് സമകാലിക വിഷയത്തിൽ പാവകളി ഒരുക്കിയത്.സാമൂഹിക അകലമടക്കമുള്ള കൊവിഡ് പ്രതിരോധ മാർഗനിർദേശങ്ങളെല്ലാം പാവകളിയിലൂടെ ജനമനസുകളിലെത്തിക്കാമെന്ന ഉറച്ച വിശ്വാസമുണ്ട് അണിയറ പ്രവർത്തകർക്ക്. പാവകളിക്ക് ജനങ്ങൾക്കിടയിലുള്ള സ്വാധീനം കൊവിഡ് ബോധവല്‍കരണത്തിനുപയോഗപ്പെടുത്തുകയാണിവിടെ. അര മണിക്കൂർ ദൈർഖ്യത്തിൽ കന്നഡ, മലയാളം, ഇംഗ്ലീഷ്, ഹിന്ദി ഭാഷകളിൽ തയ്യാറാക്കിയ പാവകളി യുടൂബിലൂടെ പ്രേക്ഷകരിലെത്തും.