കാസർകോട് : കർണാടകയിലെ വിട്‌ലയിൽ പ്രായപൂർത്തിയാകാത്ത ദലിത് പെൺകുട്ടിയെ പീഡിപ്പിച്ച കേസിൽ നാല് കാസർകോട് സ്വദേശികൾ ഉൾപ്പടെ അഞ്ച് പേർ പിടിയില്‍. പൈവളിഗെ സ്വദേശികളായ നാലുപേരും വിട്‌ലക്കാരനുമാണ് അറസ്റ്റിലായത്. പോക്സോ, ദലിത് അതിക്രമ നിയമം എന്നിവയിലെ വിവിധ വകുപ്പുകൾ എന്നിവ പ്രതികൾക്ക്‌ എതിരെ ചുമത്തിയിട്ടുണ്ട്.
ലൈംഗിക പീഡനത്തിനിരയായ പെൺകുട്ടി നിലവിൽ ചികിത്സയിലാണ്. ശനിയാഴ്‌ചയാണ് സംഭവം നടന്നത്. കാസർകോട് പൈവളിഗെ ബേരിപദവ് സ്വദേശികളായ സുകുമാര ബെള്ളാട (28), അക്ഷയ് ദേവാഡിഗ (24), കമലാക്ഷ ബെള്ളാട (30), രാജ എന്ന രാജേഷ് നായക് (23), വിട്‌ലയിലെ ജയപ്രകാശ് (26) എന്നിവരെയാണ് വിട്‌ല പൊലീസ് അറസ്റ്റ് ചെയ്‌തത്. 2019 മുതൽ പ്രായപൂർത്തിയാകാത്ത ദലിത് പെൺകുട്ടിയെ പ്രലോഭിപ്പിച്ച് പ്രതികൾ പല തവണ പീഡനത്തിനിരയാക്കുകയായിരുന്നു.
2019ൽ ജയപ്രകാശാണ് പെൺകുട്ടിയെ ആദ്യം പീഡിപ്പിച്ചത്. കഴിഞ്ഞ ശനിയാഴ്‌ച രാത്രി
പെൺകുട്ടിയെ രാജേഷ് വീട്ടുകാരറിയാതെ കെജപ്പയിലെ അങ്കണവാടിക്കടുത്തുള്ള പണി തീരാത്ത വീട്ടിലെത്തിച്ചു. ഇവിടെവച്ച് 5 പേരും കൂട്ടബലാത്സംഗത്തിന് ഇരയാക്കുകയായിരുന്നു.
അവശനിലയിൽ വീട്ടിലെത്തിയ പെൺകുട്ടി വീട്ടുകാരോട് പീഡന വിവരം വെളിപ്പെടുത്തി. മഞ്ചേശ്വരത്തും പരിസര പ്രദേശങ്ങളിൽ നിന്നുമാണ് മലയാളികളായ നാല് പ്രതികളെ വിട്‌ല പൊലീസ് അറസ്റ്റ് ചെയ്‌തത്.
17കാരിയെ കൂട്ടബലാത്സംഗം ചെയ്‌തു, അഞ്ച് പേർ പിടിയിൽ : 17കാരിയെ കൂട്ടബലാത്സംഗം ചെയ്‌ത കേസിൽ ആൺസുഹൃത്തടക്കം അഞ്ച് പേരെ പൊലീസ് പിടികൂടിയിരുന്നു. പെൺകുട്ടിയുടെ ആൺസുഹൃത്തായ സുമേഷ് (19), ആലപ്പുഴ നൂറനാട് സ്വദേശി ശക്തി (18), അനൂപ് (22), അഭിജിത്ത് (20), അരവിന്ദ് (28)എന്നിവരെയാണ് അടൂർ പൊലീസ് പിടികൂടിയത്. പത്തനംതിട്ട ചൈൽഡ് വെൽഫെയർ കമ്മിറ്റി നടത്തിയ കൗൺസിലിങ്ങില്‍ ആണ് കുട്ടി പീഡന വിവരം വെളിപ്പെടുത്തിയത്.