K-Rail| 'കേരള വികസനത്തിന്‌ കെ റെയിൽ വേണം' ; യുഡിഎഫിന്‍റേത് സങ്കുചിത രാഷ്‌ട്രീയമെന്ന് കോടിയേരി

പദ്ധതി പ്രദേശത്തിന്‍റെ പുറത്തുനിന്ന് ആളുകളെത്തിയാണ് പലയിടത്തും പ്രതിഷേധിക്കുന്നതെന്ന് കോടിയേരി ബാലകൃഷ്‌ണന്‍

കാസർകോട്: കെ റെയിൽ വിഷയത്തിൽ യുഡിഎഫിന്‍റേത് സങ്കുചിത രാഷ്ട്രീയ നിലപാടാണെന്നും പദ്ധതി പ്രദേശത്തിന്‍റെ പുറത്തുനിന്ന് ആളുകളെയെത്തിച്ചാണ് പ്രതിഷേധിക്കുന്നതെന്നും സിപിഎം സംസ്ഥാന സെക്രട്ടറി കോടിയേരി ബാലകൃഷ്‌ണന്‍. ഒരു വിഭാഗം മാധ്യമങ്ങളും എതിർപ്പുമായി രംഗത്തുണ്ട്. കേരളത്തിന്‍റെ വികസനത്തിന്‌ കെ റെയിൽ വേണം. വളര്‍ച്ച ആഗ്രഹിക്കുന്നവർ വികസന വിരോധികളെ ഒറ്റപ്പെടുത്തണമെന്നും അദ്ദേഹം പറഞ്ഞു.

ഇന്ത്യ ഹിന്ദുക്കൾ ഭരിക്കണമെന്ന രാഹുൽ ഗാന്ധിയുടെ പ്രസ്‌താവന അപകടകരമായ രാഷ്ട്രീയത്തിലേക്ക് നയിക്കും. കേരളം കലങ്ങട്ടെ ലഹളകൾ ഉണ്ടാകട്ടെ എന്ന നിലപാടാണ് കോൺഗ്രസിനെ നയിക്കുന്നത്. കോൺഗ്രസ് ഹിന്ദു വർഗീയത വളർത്തുമ്പോൾ മുസ്‌ലിം വർഗീയത ശക്തിപ്പെടുത്തുകയാണ് ലീഗെന്നും കോടിയേരി പറഞ്ഞു.

കേരളത്തെ കലാപഭൂമിയാക്കാൻ ആർഎസ്എസും എസ്‌ഡിപിഐയും ശ്രമിക്കുന്നു. ഇവരെ അകറ്റി നിർത്തണമെന്നും സിപിഎം സംസ്ഥാന സെക്രട്ടറി കൂട്ടിച്ചേര്‍ത്തു.