കാസർകോട്:രാഷ്‌ട്രീയ കോലാഹലങ്ങൾക്ക് വഴിയൊരുക്കിയ മഞ്ചേശ്വരം തെരഞ്ഞെടുപ്പ് കോഴക്കേസിൽ അന്വേഷണം ആരംഭിച്ച് ഒരു വർഷം പിന്നിട്ടിട്ടും കുറ്റപത്രം സമർപ്പിക്കാതെ അന്വേഷണ സംഘം. കേസിൽ മതിയായ തെളിവുകൾ കണ്ടെത്താൻ ക്രൈം ബ്രാഞ്ചിന് സാധിക്കാത്തത് കൊണ്ടാണ് കുറ്റപത്രം സമർപ്പിക്കാൻ വൈകുന്നതെന്നാണ് ബിജെപി നേതൃത്വത്തിന്‍റെ നിലപാട്. കേസിൽ രണ്ട് മാസം മുമ്പ് അന്വേഷണ സംഘം കോടതിയിൽ ഇടക്കാല റിപ്പോർട്ട് സമർപ്പിച്ചിരുന്നു.
കഴിഞ്ഞ നിയമസഭ തെരഞ്ഞെടുപ്പിൽ സ്ഥാനാർഥിത്വം പിൻവലിക്കാൻ കെ സുന്ദരയെ ബിജെപി നേതാക്കൾ പണം നൽകി സ്വാധീനിച്ചെന്നാണ് കേസ്. ബിജെപി സംസ്ഥാന അധ്യക്ഷൻ കെ സുരേന്ദ്രൻ ഉൾപ്പെടെ ആറ് പേരാണ് കേസിലെ പ്രതികൾ. കേസ് അട്ടിമറിക്കാൻ രാഷ്‌ട്രീയ ഇടപെടലുണ്ടായെന്ന സംശയം നേരത്തെ കെ സുന്ദരയും പ്രകടിപ്പിച്ചിരുന്നു.