ഡോളോ ഗുളികയിൽ ഇന്ത്യ, ബോട്ടിലിൽ മോഹൻലാലും മമ്മൂട്ടിയും; ശ്രദ്ധയയായി ഭവ്യ

പത്ത് മിനിട്ടിനുള്ളിൽ ഡോളോ ഗുളികയിൽ ഒന്നര സെൻ്റീമീറ്റർ വലിപ്പത്തിലുള്ള ഇന്ത്യയുടെ ഭൂപടം വരച്ചതിന് ഭവ്യക്ക് ഇന്ത്യ ബുക്ക് ഓഫ് റെക്കോഡ്‌സ് പുരസ്‌കാരവും ലഭിച്ചു

കാസർകോട്:ഡോളോ ഗുളികയിൽ ഇന്ത്യൻ ഭൂപടം വരച്ച് ഇന്ത്യ ബുക്ക് ഓഫ് റെക്കോഡ്‌സിൽ ഇടം നേടിയിരിക്കുകയാണ് നീലേശ്വരം സ്വദേശിയായ ഭവ്യ. പത്ത് മിനിട്ടിനുള്ളിലാണ് ഡോളോ ഗുളികയിൽ ഒന്നര സെൻ്റീമീറ്റർ വലിപ്പത്തിലുള്ള ഇന്ത്യയുടെ ഭൂപടം വരച്ചത്. ഇതിനുപുറമേ ബോട്ടിൽ ആർട്ട്‌, ഭരതനാട്യം, കേക്ക് നിർമാണം തുടങ്ങിയ നിരവധി മേഖലകളിലും പതിനാലുകാരിയായ ഭവ്യ കഴിവ് തെളിയിച്ചിട്ടുണ്ട്.

കക്കാട്ട് ജി.എച്ച്.എസ്.എസിലെ ഒൻപതാം ക്ലാസ് വിദ്യാർഥിയാണ് ഭവ്യ. ലോക്ക്‌ഡൗൺ കാലത്തെ വിരസത മാറ്റാൻ ബോട്ടിൽ ആർട്ട് ചെയ്‌തു തുടങ്ങിയതായിരുന്നു. ഇതിനകം 65ഓളം ബോട്ടിൽ ആർട്ടുകൾ തീർത്ത ഭവ്യ, മോഹൻലാൽ, മമ്മൂട്ടി, സച്ചിൻ ടെൻഡുൽക്കർ തുടങ്ങി പ്രമുഖരുടെ പിറന്നാൾ ദിനത്തിൽ ആശംസകൾ നേർന്നു കൊണ്ട് ബോട്ടിൽ വിസ്‌മയം തീർത്തിരുന്നു.

പിന്നീട് വ്യത്യസ്‌തമായി എന്തെങ്കിലും പരീക്ഷിക്കണമെന്ന ആശയത്തിൽ നിന്നാണ് ഗുളികയിൽ ഭൂപടം തീർക്കാനുള്ള പ്രേരണയുണ്ടാകുന്നത്. ഡോളോ ഗുളികയിലെ കലാസൃഷ്‌ടി സാഹസം നിറഞ്ഞതായിരുന്നുവെന്ന് ഭവ്യ പറയുന്നു.

എട്ടുവർഷമായി ഭരതനാട്യ രംഗത്തും ഈ കൊച്ചുകലാകാരി സജീവമാണ്. പിറന്നാൾ കേക്ക് നിർമാണത്തിലൂടെയും ഭവ്യ ചെറിയൊരു വരുമാനം കണ്ടെത്തുന്നുണ്ട്. മാതാപിതാക്കളായ രാജീവനും അനിതയും സഹോദരനായ കൗസ്‌തുബും പൂർണ പിന്തുണയുമായി ഒപ്പമുണ്ട്.