കാസര്‍കോട്: അര്‍ജന്‍റീന ഉറപ്പായും ജയിക്കും.. മെസി ഹാട്രിക് അടിക്കും....ഈ വാക്കുകള്‍ മലയാളി മറക്കാനിടയില്ല. ഖത്തർ ലോകകപ്പിലെ ആദ്യമത്സരത്തില്‍ സൗദി അറേബ്യയോട് അര്‍ജന്‍റീന പരാജയപ്പെട്ടപ്പോള്‍ കളിയാക്കലുകള്‍ക്ക് കരഞ്ഞുകൊണ്ട് മറുപടി പറഞ്ഞ കുഞ്ഞു നിബ്രാസിനെ ഓര്‍മയില്ലേ.
മെസിയെ നേരിട്ട് കാണാൻ നിബ്രാസ് ഖത്തറിലേക്ക് മെസിയെ ഏറെ ഇഷ്‌ടപ്പെടുന്ന അര്‍ജന്‍റീനയുടെ കുട്ടി ആരാധകന്‍ തന്‍റെ പ്രിയ താരത്തെ നേരില്‍ കാണാനുള്ള ഒരുക്കത്തിലാണ്. പയ്യന്നൂർ കേന്ദ്രീകരിച്ച് പ്രവർത്തിക്കുന്ന സ്‌മാർട്ട്‌ ട്രാവൽ ഏജൻസിയാണ് നിബ്രാസിനെ ഖത്തറിലെത്തിക്കുന്നത്. ട്രാവൽ ഏജൻസിയിൽ നിന്നും വിളിയെത്തിയപ്പോൾ തനിക്ക് സന്തോഷമടക്കാൻ കഴിഞ്ഞില്ലെന്ന് നിബ്രാസ് പറയുന്നു.
അർജന്‍റീനയോടും മെസിയോടുമുള്ള തന്‍റെ ആരാധന ട്രാവൽ ഏജൻസിയുടെ ശ്രദ്ധയിൽ എത്തിച്ച ഇടിവി ഭാരതിനും നിബ്രാസ് നന്ദി അറിയിച്ചു. അർജന്‍റീനയുടെ കളി കാണുന്നതിനൊപ്പം താരങ്ങളെ നേരിട്ട് കാണാനുള്ള ക്രമീകരണവും ട്രാവൽ ഏജൻസി ഒരുക്കുന്നുണ്ട്. ആദ്യ മത്സരത്തിൽ അർജന്‍റീന പരാജയപ്പെട്ടെങ്കിലും നിബ്രാസ് പ്രവചിച്ചപോലെ രണ്ടാം മത്സരത്തിൽ മെസി ഗോൾ നേടുകയും അർജന്‍റീന ജയിക്കുകയും ചെയ്‌തു.
ഏതായാലും അർജന്‍റീൻ ആരാധകരുടെയാകെ പ്രതീകമായി നിബ്രാസ് അത്തറു മണക്കുന്ന ഖത്തറിലേക്ക് പറക്കാനൊരുങ്ങുകയാണ്, മിശിഹയെ നേരില്‍ കാണാനും ലോകകിരീടം സ്വന്തമാക്കുമ്പോൾ ഖത്തറിലെ ആവേശത്തിലാറാടാനും.
also read: 'അന്ന് കരഞ്ഞു, ഇനി ചിരിക്കും'.. അർജന്‍റീനയുടെ കുട്ടി ആരാധകൻ നിബ്രാസ് ഇടിവി ഭാരതിനോട്
