കണ്ണൂർ: തദ്ദേശ തെരഞ്ഞെടുപ്പ് മത്സര ചിത്രം തെളിഞ്ഞതോടെ പ്രചാരണങ്ങൾക്കായി ഫ്ലെക്‌സ് ബോർഡുകൾ ഒരുക്കുന്ന തിരക്കിലാണ് തളിപ്പറമ്പിലെ പ്രിന്‍റിങ്ങ് മേഖലയിലുള്ളവർ. ഫ്ലെക്‌സ് ബോർഡുകൾ ഉപയോഗിച്ച് പ്രചാരണങ്ങൾക്ക് മോടി കൂട്ടുകയാണ് മുന്നണികളും.
എല്ലാ മുന്നണി സ്ഥാനാർഥികളുടെയും ഫ്ലെക്‌സുകൾ ഫ്രെയ്‌മുകളോടെയും അല്ലാതെയും നിർമിച്ചു നൽകുന്ന തിരക്കിലാണ് പ്രിന്‍റിങ്ങ് തൊഴിലാളികൾ. കൊവിഡ് കാലമായതിനാൽ നിബന്ധനകളോടെയാണ് തെരഞ്ഞെടുപ്പ് പ്രചാരണങ്ങൾ. നോട്ടീസുകൾ, ഫ്ലെക്‌സുകൾ, ചുമരെഴുത്ത് തുടങ്ങിയവ ഉപയോഗിച്ച് പ്രചാരണങ്ങൾ നടത്തുന്നതിനാണ് മുൻഗണന. കോട്ടൺ മെറ്റീരിയൽ ഉപയോഗിച്ച ഫ്ലെക്‌സ് പ്രിന്‍റിങ്ങാണ് ഉപയോഗിക്കുന്നതെന്ന് ഉടമകൾ പറയുന്നു. വ്യത്യസ്‌തങ്ങളായ ഡിസൈനുകളിലൂടെയാണ് പ്രിന്‍റിങ് മേഖലയിലുള്ളവർ സ്ഥാനാർഥികളെ ആകർഷിക്കുന്നത്. കൊവിഡ് കാലമായതിനാൽ ഇളവുകളും ഇവർ വാഗ്‌ദാനം ചെയ്യുന്നുണ്ട്. കൊവിഡ് കാലത്തെ പ്രതിസന്ധിയിൽ നിന്നും പ്രിന്‍റിങ് മേഖലയുടെ ഉയർത്തെഴുന്നേൽപ്പിന് കൂടി കാരണമാവുകയാണ് തെരഞ്ഞെടുപ്പ് കാലം.