Prepaid auto issue kannur | 'റെയിൽവേ സ്റ്റേഷനിലെ പ്രീപെയ്‌ഡ് ഓട്ടോ സംവിധാനം കടന്നപ്പള്ളി രാമചന്ദ്രൻ കുളമാക്കി'; എംഎൽഎക്കെതിരെ മേയര്‍

Kannur mayor allegations against MLA പ്രീപെയ്‌ഡ് കൗണ്ടറുമായി ബന്ധപ്പെട്ട വിഷയത്തില്‍, തൊഴിലാളി സംഘടനകളെക്കൂടി ഉള്‍ക്കൊള്ളിച്ച് ചര്‍ച്ച നടത്താത്തത് അടക്കമുള്ളവ ചൂണ്ടിക്കാട്ടിയാണ് മേയര്‍ എംഎല്‍എക്കെതിരെ തിരിഞ്ഞത്

കണ്ണൂർ :റെയിൽവേ സ്റ്റേഷനിലെ പ്രീപെയ്‌ഡ് ഓട്ടോ സംവിധാനവുമായി (Prepaid auto service kannur railway station) ബന്ധപ്പെട്ട വിഷയം മേയറും എംഎൽഎയും തമ്മിലുള്ള തുറന്ന പോരിലേക്ക് നീങ്ങുന്നു. കണ്ണൂർ റെയിൽവേ സ്റ്റേഷനിൽ (Kannur railway station) പ്രീപെയ്‌ഡ് കൗണ്ടർ വരുന്നത് സംയുക്ത തൊഴിലാളി സംഘടനകളുടെ പ്രതിനിധികളും മറ്റ് സംഘടന നേതാക്കളും സ്വാഗതം ചെയ്‌തിരുന്നു. എന്നാൽ, കൗണ്ടറുമായി ബന്ധപ്പെട്ട വിഷയങ്ങൾ ചർച്ച ചെയ്യേണ്ടത് തൊഴിലാളി സംഘടനകളെക്കൂടി ഉള്‍ക്കൊള്ളിച്ചാണെന്നിരിക്കെ മറിച്ച് സംഭവിച്ചതിലാണ് മേയര്‍ എംഎല്‍എക്കെതിരെ തിരിഞ്ഞത് (kannur Mayor against MLA).

കഴിഞ്ഞ ദിവസം നടന്ന പ്രീപെയ്‌ഡ് കൗണ്ടര്‍ ഉദ്ഘാടനം പോലും തൊഴിലാളി സംഘടനകൾ അറിഞ്ഞിരുന്നില്ലെന്നും രേഖാമൂലം നൽകിയ ആവശ്യങ്ങൾ പോലും പരിഗണിക്കപ്പെട്ടില്ലെന്നും നേതാക്കൾ കുറ്റപ്പെടുത്തുന്നു. ഇതാണ് മേയറെ ചൊടിപ്പിക്കാൻ കാരണമായത്. യഥാർഥത്തിൽ റെയിൽവേ സ്റ്റേഷനിലെ പ്രീപെയ്‌ഡ് ഓട്ടോ സംവിധാനം കുളമാക്കിയത് രാമചന്ദ്രൻ കടന്നപ്പള്ളി എംഎൽഎയും പൊലീസും ചേർന്നാണെന്നാണ് മേയറുടെ കുറ്റപ്പെടുത്തല്‍.

ട്രാഫിക് റെഗുലേറ്ററി കമ്മിറ്റിയുടെ അധ്യക്ഷൻ മേയർ ആണ്. കൗണ്ടർ തുറക്കാൻ കമ്മിറ്റി തീരുമാനിച്ചിരുന്നതാണെന്നും ഇതിനായി ടൗൺ പരിധിയും നിരക്കും പുതുക്കി നിശ്ചയിക്കാൻ കമ്മിറ്റിയെ ചുമതലപ്പെടുത്തുകയും ചെയ്‌തതാണ്. ഇതിനിടെയിൽ എംഎൽഎ ഇടപെട്ട് കൗണ്ടർ കാര്യം കോർപറേഷനെയോ ട്രാഫിക് കമ്മിറ്റിയോ അറിയിച്ചില്ല. ഓട്ടോറിക്ഷ തൊഴിലാളികളെ പോലും അറിയിക്കാതെയായിരുന്നു ഉദ്ഘാടനമെന്നും കണ്ണൂര്‍ മേയര്‍ ആരോപിച്ചു.

എംഎൽഎയുടെ അധികാര പരിധിയിൽ വരാത്ത വിഷയങ്ങളിൽ കൈകടത്തി പ്രശ്‌നങ്ങൾ വഷളാക്കുന്ന സമീപനമാണ് കടന്നപ്പള്ളി രാമചന്ദ്രൻ എംഎൽഎ സ്വീകരിക്കുന്നതെന്ന് മേയർ അഡ്വ. ടിഒ മോഹനൻ പറയുന്നു (TO Mohanan against kadannappalli ramachandran). റെയിൽവേ സ്റ്റേഷൻ പരിസരത്ത് കഴിഞ്ഞ ദിവസം ഉദ്ഘാടനം ചെയ്‌തുവെന്ന് പറയുന്ന പ്രീപെയ്‌ഡ് ഓട്ടോ സംവിധാനം എംഎൽഎയുടെ വിവരക്കേടിന്‍റെ ഏറ്റവും വലിയ ഉദാഹരണമാണെന്നും ടിഒ മോഹനൻ കുറ്റപ്പെടുത്തി.

'പൊലീസിന്‍റേതും എംവിഡിയുടേതും നാണംകെട്ട സമീപനം':2011ലെ പൊലീസ് ആക്‌ടിലെ 72ാം വകുപ്പ് പ്രകാരം മേയർ അധ്യക്ഷനായി, ജില്ല ഭരണകൂടം, പൊലീസ്, മോട്ടോർ വാഹന വകുപ്പ്, പൊതുമരാമത്ത് വകുപ്പ് എന്നിവയുടെ പ്രതിനിധികൾ ഉൾക്കൊള്ളുന്ന സമിതി കോർപറേഷൻ ട്രാഫിക് കമ്മിറ്റിയുടെ പരിഗണനയിൽ വരുന്നു.

പ്രീപെയ്‌ഡ് ഓട്ടോ സംബന്ധിച്ച കാര്യത്തില്‍ പരിഹാരം കാണാന്‍ ട്രാഫിക് റെഗുലേറ്ററി കമ്മിറ്റി അംഗം പോലുമല്ലാത്ത എംഎൽഎ, ഇടപെട്ട് വഷളാക്കിയിരിക്കുകയാണ്. ഇതിനെല്ലാം കുടപിടിക്കുന്ന നാണംകെട്ട സമീപനമാണ് പൊലീസും മോട്ടോർ വാഹന വകുപ്പും ഉൾപ്പടെയുള്ള ഉദ്യോഗസ്ഥ സംവിധാനവും സ്വീകരിക്കുന്നതെന്നും ടിഒ മോഹനൻ ആരോപിക്കുന്നു.

പൊലീസ് ആക്‌ടിനെ തന്നെ പരിഹസിക്കുന്ന നിലപാടാണ് ഇവരുടേത്. കോർപറേഷൻ ട്രാഫിക് റെഗുലേറ്ററി കമ്മിറ്റിയിൽ അംഗമായ ജില്ല മജിസ്ട്രേറ്റ് കൂടിയായ ജില്ല കലക്‌ടറുടെ അറിവോടെയും സമ്മതത്തോടെയും ആണോ ഇത്തരം നിയമവിരുദ്ധ നടപടികൾ എന്നറിയാൻ താത്‌പര്യമുണ്ടെന്നും മേയർ ചൂണ്ടികാട്ടി. കേരളത്തിലെ ആകെയുള്ള ആറ് എണ്ണത്തില്‍ യുഡിഎഫ് ഭരിക്കുന്ന ഏക കോർപറേഷനാണ് കണ്ണൂരിലേത്.