അമാൻ ഗോൾഡ് നിക്ഷേപത്തട്ടിപ്പിൽ കൂടുതൽ കേസുകൾ രജിസ്റ്റർ ചെയ്ത് പൊലീസ്

അമാൻ ഗോൾഡ്‌ എംഡി രാമന്തളി വടക്കുമ്പാട്ടെ പി കെ മൊയ‌്തു ഹാജിക്കെതിരെയാണ് കേസ്. ഇയാളെ കൂടാതെ എട്ട് ഡയറക്ടർമാർ കൂടി സ്ഥാപത്തിനുണ്ട്. ഇതിൽ ഒരാൾ നാടുവിട്ടെന്നും മറ്റുള്ളവരെ ഉടൻ കണ്ടെത്തുമെന്നും പൊലീസ് പറഞ്ഞു.

കണ്ണൂർ: കാസർകോട് ഫാഷൻ ഗോൾഡ് തട്ടിപ്പിന് സമാനമായി നടന്ന പയ്യന്നൂരിലെ അമാൻ ഗോൾഡ് നിക്ഷേപത്തട്ടിപ്പിൽ കൂടുതൽ കേസുകൾ രേഖപ്പെടുത്തി പൊലീസ്. പത്ത് നിക്ഷേപകർ നൽകിയ കേസിൽ കഴിഞ്ഞ ദിവസം മൂന്ന് കേസ് രജിസ്ട്രർ ചെയ്ത പൊലീസ് പുതുതായി മൂന്ന് കേസുകൾ കൂടി രജിസ്ട്രർ ചെയ്തു. ലാഭവിഹിതം ഉൾപ്പെടെ തിരിച്ച് നൽകാമെന്ന വ്യവസ്ഥയിൽ സ്വീകരിച്ച നിക്ഷേപം തിരിച്ച് നൽകാതെ വഞ്ചിച്ചുവെന്ന പരാതിയിലാണ് പയ്യന്നൂർ പൊലീസ‌് കേസെടുത്തത്. അമാൻ ഗോൾഡ്‌ എംഡി രാമന്തളി വടക്കുമ്പാട്ടെ പി കെ മൊയ‌്തു ഹാജിക്കെതിരെയാണ് കേസ്. ഇയാളെ കൂടാതെ എട്ട് ഡയറക്ടർമാർ കൂടി സ്ഥാപത്തിനുണ്ട്. ഇതിൽ ഒരാൾ നാടുവിട്ടെന്നും മറ്റുള്ളവരെ ഉടൻ കണ്ടെത്തുമെന്നും പൊലീസ് പറഞ്ഞു.

കുഞ്ഞിമംഗലം കൊവ്വപ്പുറത്തെ ടി പി ഇബ്രാഹംകുട്ടി, തൃക്കരിപ്പൂർ ഉടുമ്പുന്തലയിലെ ടി നൂറുദ്ദീൻ, പെരുമ്പയിലെ കെ കുഞ്ഞാലിമ തുടങ്ങി പത്ത് പേരാണ് നിലവിൽ പരാതി നൽകിയത്. ഇബ്രാഹിം കുട്ടിയിൽനിന്ന്‌ 2016 ഒക്ടോബർ 31ന് 20 ലക്ഷം രൂപയും നൂറുദ്ദീനിൽ നിന്ന്‌ 2017 ജൂലൈ ഒമ്പതിന് 15 ലക്ഷം രൂപയും കുഞ്ഞാലിമയിൽ നിന്ന്‌ 2016 ഫെബ്രുവരി ഒമ്പതിന്‌ മൂന്നുലക്ഷം രൂപയുമാണ്‌ നിക്ഷേപമായി സ്വീകരിച്ചത് എന്നതിൽ പൊലീസിന് തെളിവ് ലഭിച്ചു. ഇതുവരെ അരക്കോടി രൂപയുടെ തട്ടിപ്പാണ് വെളിച്ചത്ത് വന്നത്. അഞ്ഞൂറിലേറെ പേരിൽ നിന്ന് നിക്ഷേപം സ്വീകരിച്ച ജ്വല്ലറിക്കെതിരെ കൂടുതൽ പേർ വരും ദിവസങ്ങളിൽ പരാതിയുമായി രംഗത്തെത്തിയേക്കും. നിക്ഷേപകരുടെ നേതൃത്വത്തിൽ ആക്ഷൻ കമ്മറ്റി രൂപീകരിക്കുകയും ഒത്തുതീർപ്പ് ചർച്ചകൾ നടത്തി പരാജയപ്പെടുകയും ചെയ്ത സാഹചര്യത്തിലാണ് നിക്ഷേപകർ നിയമവഴി സ്വീകരിച്ചത്.