ഹിജാബ് വിധി പ്രതിപക്ഷത്തിനേറ്റ തിരിച്ചടി; സ്വാഗതം ചെയ്യുന്നുവെന്ന് പി.കെ കൃഷ്‌ണദാസ്

ഹിജാബ് വിഷയത്തിൽ മുഖ്യമന്ത്രിയും പ്രതിപക്ഷ നേതാവും നിലപാട് വ്യക്തമാക്കണമെന്ന് ബിജെപി നേതാവ് പി.കെ കൃഷ്‌ണദാസ് ആവശ്യപ്പെട്ടു.

കണ്ണൂർ: ഹിജാബ് വിഷയവുമായി ബന്ധപ്പെട്ട കർണാടക ഹൈക്കോടതിയുടെ വിധി ബിജെപി സ്വാഗതം ചെയ്യുന്നുവെന്ന് ബിജെപി ദേശീയ നിർവാഹക സമിതി അംഗം പി.കെ കൃഷ്‌ണദാസ്. വർഗീയ വിഷയങ്ങൾ ഉയർത്തികൊണ്ടുവന്ന് രാജ്യത്ത് കലാപം സൃഷ്‌ടിക്കാനുള്ള ചിലരുടെ ശ്രമമാണ് ഇല്ലാതായത്. ഈ വിഷയത്തിൽ മുഖ്യമന്ത്രിയും പ്രതിപക്ഷ നേതാവും നിലപാട് വ്യക്തമാക്കണമെന്നും അദ്ദേഹം ആവശ്യപ്പെട്ടു.

കേരളത്തിലെ വിദ്യാലയങ്ങളിൽ ഏകീകൃത യൂണിഫോം നടപ്പാക്കണമെന്നും കൃഷ്‌ണദാസ് പറഞ്ഞു. മതത്തിൻ്റെ അടിസ്ഥാനത്തിൽ ജനങ്ങളെ ഭിന്നിപ്പിക്കുന്ന സിപിഎമ്മിനും കോൺഗ്രസിനുമേറ്റ തിരിച്ചടിയാണ് കർണാടക ഹൈക്കോടതി വിധിയെന്നും കണ്ണൂരിൽ മാധ്യമ പ്രവർത്തകരോട് അദ്ദേഹം പറഞ്ഞു.