കണ്ണൂർ: സർവീസിൽ നിന്ന് വിരമിച്ച ശേഷം സഹപ്രവർത്തകരുടെയും ശിഷ്യരുടെയും യാത്രയയപ്പ് സ്വീകരിച്ച ശേഷം വീട്ടിലേക്ക് ആനയിക്കപ്പെടേണ്ട അധ്യാപകനായിരുന്നു പയ്യന്നൂർ കോറോം വനിത പോളിടെക്‌നിക്കിലെ ജേക്കബ് ജോസഫ്. എന്നാൽ വിരമിച്ച മെയ് 31 മുതൽ പോളിടെക്‌നിക്കിന് മുന്നിൽ അനിശ്ചിതകാല നിരാഹാര സമരത്തിലാണ് ഈ അധ്യാപകൻ.
വിരമിച്ച ഉടൻ നിരാഹാര സത്യഗ്രഹം തുടങ്ങി പോളിടെക്‌നിക് അധ്യാപകൻ
23 വർഷത്തെ തന്‍റെ അധ്യാപന ജീവിതത്തിനിടയിൽ 12 വർഷവും ജേക്കബ് ജോസഫ് ഇലക്‌ട്രിക്കൽ ലക്‌ചറർ തസ്‌തികയിലായിരുന്നു. അർഹത ഉണ്ടായിട്ടും യഥാസമയം സ്ഥാനക്കയറ്റം ലഭിക്കാത്തതു കൊണ്ട് മറ്റ് നിരവധി അധ്യാപകരെ പോലെ ഇദ്ദേഹവും ഡി ഗ്രേഡ് ലക്‌ചറർ തസ്‌തികയിൽ തുടർന്നു. 2006ലെ പരിഷ്‌കരിച്ച സ്‌കെയിലിലായിരുന്നു ശമ്പളം.