കണ്ണൂർ: പയ്യന്നൂർ നഗരത്തെ കാവ്വായിയുമായി ബന്ധിപ്പിക്കുന്ന പയ്യന്നൂർ കവ്വായി വാടിപ്പുറം പാലത്തിന്‍റെ അവസ്ഥ നിലവിൽ വളരെ ശോചനീയമാണ്. കാലപ്പഴക്കത്താൽ പലത്തിന്‍റെ പലഭാഗങ്ങളും അടർന്നു പോയിട്ടുണ്ട്. തുടർന്ന് ബന്ധപ്പെട്ട അധികൃതർ അറ്റകുറ്റപ്പണികൾ നടത്തിയെങ്കിലും നിലവിലെ ബലക്ഷയം പരിഹരിക്കാൻ ആവശ്യമായ ശാശ്വത നടപടികൾ ഒന്നും സ്വീകരിച്ചിട്ടില്ല.
പാലം പണിത് കഴിഞ്ഞിട്ട് 32 വർഷത്തോളം ആയെങ്കിലും ഇതേവരെ ആവശ്യമായ മെയിന്‍റനൻസ് വർക്ക്‌ നടത്തി ബലക്ഷയം പരിഹരിക്കാൻ അധികൃതർ തയ്യാറായിട്ടില്ല. നിലവിലെ അപകടാവസ്ഥയിലൂടെ വളരെ ഭീതിയോട് കൂടിയാണ് വാഹനങ്ങൾ പാലത്തിന് മുകളിൽ കൂടി കടന്നുപോകുന്നത്. കൂടാതെ പാലത്തിന്‍റെ വീതിക്കുറവ് കാരണം വലിയ വാഹനങ്ങൾക്ക് ഇതിലൂടെ സഞ്ചരിക്കാൻ സാധിക്കാത്ത അവസ്ഥയാണുള്ളത്.
പാലത്തിന്‍റെ ഇരുവശങ്ങളും കാടുമൂടിക്കിടക്കുകയാണ്. ഇവിടങ്ങളിൽ സാമൂഹ്യ വിരുദ്ധർ പ്ലാസ്റ്റിക് മാലിന്യങ്ങൾ അടക്കം തള്ളുന്നതും പതിവായിട്ടുണ്ട്. അധികൃതർ ആവശ്യമായ അടിയന്തര നടപടികൾ സ്വീകരിക്കണമെന്നാണ് നാട്ടുകാരുടെ ആവശ്യം.
