കണ്ണൂർ:ദാരു ശില്പകലയിൽ പരിയാരത്തിന്‍റെ പേരിനും പ്രശസ്തിക്കും പകിട്ടേകുകയാണ് കോക്കാൻവളപ്പിൽ പവിത്രനെന്ന യുവ ശില്പി. 500 വർഷത്തോളം പഴക്കമുള്ള ശില്പ കലാ പാരമ്പര്യത്തിന്‍റെ ഇപ്പോഴത്തെ തുടർച്ചക്കാരനാണ് പവിത്രൻ. പതിനഞ്ചാം വയസിൽ കുണ്ടിലെവളപ്പിൽ ചാത്തു കേരളവർമ്മൻ ആചാരിയുടെ ശിഷ്യനായി ദാരുശില്പ കലയിലേക്ക് ചുവടുവെച്ച പവിത്രൻ 25 വർഷത്തിനിടെ 250 ഓളം കിംപുരുഷ രൂപങ്ങളും, 1500 ഓളം തെയ്യക്കോല രൂപങ്ങളും, നാല് ദാരു പ്രതിഷ്ട വിഗ്രഹങ്ങളും നിർമിച്ചിട്ടുണ്ട്. മരത്തിൽ അളവും മനസും കൊണ്ട് കൊത്തിയെടുക്കുന്ന ഓരോ രൂപങ്ങളും കാണുന്നവർക്ക് അത്ഭുതം തന്നെയാണ്.
കണ്ണൂർ കാനത്തൂർ ചീറുമ്പക്കാവിലെ ദാരികാവധം കഥ, മട്ടന്നൂർ തെരൂർ വേട്ടക്കൊരുമകൻ ക്ഷേത്രത്തിലെ കിരാതേശ്വര പ്രതിഷ്ട, തലവിൽ തൃപ്പന്നിക്കുന്ന് ശിവക്ഷേത്രത്തിലെ പ്രതിഷ്ഠ വിഗ്രഹം, പരിയാരം ഉദയപുരം ക്ഷേത്രത്തിലെ നരിവാഹനം തുടങ്ങി കേരളത്തിനകത്തും പുറത്തും 350ഓളം ക്ഷേത്രങ്ങളിൽ പവിത്രന് ശില്പങ്ങള്‍ നിർമിച്ചിട്ടുണ്ട്.