കണ്ണൂർ: ഇരിട്ടിയിൽ 40 പായ്ക്കറ്റ് കർണാടക മദ്യവും എട്ട് ലിറ്റർ കേരള മദ്യവുമായി യുവാവ് പിടിയിൽ. ഇരിട്ടി എക്സൈസ് സർക്കിൾ ഓഫീസിലെ പ്രിവന്‍റീവ് ഓഫീസർ കെ.ആനന്ദകൃഷ്ണന്‍റെ നേതൃത്വത്തിൽ കാലാങ്കിയിൽ നടത്തിയ റെയിഡിലാണ് മാട്ടറ-കാലാങ്കി സ്വദേശി എം.ജി.അരുൺ (23) എന്നയാളെ അറസ്റ്റു ചെയ്തത്.
മട്ടന്നൂർ കോടതിയിൽ ഹാജരാക്കിയ പ്രതിയെ റിമാന്‍റ് ചെയ്തു. ഈ പ്രദേശങ്ങളിൽ പ്രതിയുടെ നേതൃത്വത്തിൽ അനധികൃത മദ്യ വില്പന സജീവമാണെന്ന ഉത്തരമേഖലാ ജോയിന്‍റ് എക്സൈസ് കമ്മിഷണർ സ്ക്വാഡിനു ലഭിച്ച രഹസ്യവിവരത്തിന്‍റെ അടിസ്ഥാനത്തിലായിരുന്നു പരിശോധന. പ്രതിയെ ചോദ്യം ചെയ്തതതോടെ ഈ മേഖലയിലെ മറ്റു അനധികൃത മദ്യലോബികളെക്കുറിച്ചും എക്സൈസിന് വിവരം ലഭിച്ചിട്ടുണ്ട്. അനധികൃത മദ്യവിൽപ്പനക്കെതിരെ വരും ദിവസങ്ങളിലും ശക്തമായ നടപടികൾ സ്വീകരിക്കുമെന്ന് എക്സൈസ് അധികൃതർ അറിയിച്ചു.