ഇടുക്കി: മാങ്കുളം ഗ്രാമപഞ്ചായത്തിലെ മാങ്ങാപ്പാറ കുടിയിലേക്ക് എത്താൻ വാഹനം കടന്നുപോകും വിധം പാലം വേണമെന്ന ആവശ്യവുമായി ആദിവാസി കുടുംബങ്ങൾ. നിലവിൽ മാങ്ങാപ്പാറയിലേക്ക് എത്തിപ്പെടണമെങ്കിൽ ജീപ്പില്‍ പുഴ മുറിച്ച് കടക്കേണ്ട അവസ്ഥയാണുള്ളത്. വാഹന ഗതാഗതം സാധ്യമാകുംവിധം ഇവിടെ പുതിയൊരു പാലം വേണമെന്ന ആദിവാസി കുടുംബങ്ങളുടെ ആവശ്യം ഇന്നും അധികൃതരുടെ ചെവികളില്‍ എത്തിയിട്ടില്ല.
കാല്‍നടയാത്രക്ക് ഒരു നടപ്പാലമുണ്ടെങ്കിലും വാഹനയാത്ര ഇന്നും പുഴമുറിച്ച് കടന്ന് സാഹസികമായി തുടരുകയാണ്. മഴക്കാലത്ത് പുഴ കുതിച്ചൊഴുകാന്‍ തുടങ്ങുന്നതോടെ ഇതുവഴിയുള്ള സാഹസിക യാത്രയും നിലയ്‌ക്കും. പാലമില്ലാത്തതിനാല്‍ പുഴയ്‌ക്ക് കുറുകെ ജീവന്‍ കയ്യില്‍ പിടിച്ച് യാത്ര ചെയ്യാതെ മറ്റ് മാർഗങ്ങളില്ല.
പുഴയിലെ വലിയ കുഴികളില്‍ കുടിനിവാസികളും ഡ്രൈവര്‍മാരും ചേര്‍ന്ന് കല്ലുകളിട്ട് നികത്തി ഒരുവിധത്തിലാണ് വാഹനം മറുകര കടത്തുന്നത്. വെള്ളം നിറഞ്ഞൊഴുകുന്ന പുഴയില്‍ എവിടെയാണ് കുഴിയെന്ന് പോലും വ്യക്തമായി കാണാന്‍ കഴിയില്ല. സ്‌കൂള്‍ വിദ്യാര്‍ഥികളും പ്രായമായവരും രോഗികളും അടക്കം വാഹനയാത്ര സാധ്യമാക്കുന്നത് ജീപ്പിൽ സാഹസികമായി പുഴ മുറിച്ച് കടന്നാണ്.