ദുരിതംപേറി കൈറ്റിന് കീഴിലെ അധ്യാപകര്‍ കണ്ണൂര്‍: കഴിഞ്ഞ അഞ്ച് മാസമായി ശമ്പളമില്ലാതെ ദുരിതത്തിലായിരിക്കുകയാണ് കൈറ്റിന് (കേരള ഇന്‍ഫ്രാസ്‌ടെക്‌ച്ചര്‍ ആന്‍ഡ് ടെക്‌നോളജി ഫോര്‍ എഡ്യുക്കേഷന്‍ (KITE) കീഴില്‍ ദിവസ വേതനത്തില്‍ പ്രവര്‍ത്തിക്കുന്ന അധ്യാപകര്‍. കൈറ്റിന് കീഴില്‍ ജില്ലയില്‍ മാത്രം 18 പേരും കേരളത്തിലാകെ 228 അധ്യാപകരുമാണുള്ളത്. ഇവരാണ് നയാപൈസ ശമ്പളമില്ലാതെ ബുദ്ധിമുട്ടിലായിരിക്കുന്നത്.
കൈറ്റിന് കീഴിലെ ട്രെയിനർമാർ ട്രെയിനിങ്ങിന് പോകുമ്പോൾ വിവിധ വിഷയങ്ങളിലെ അധ്യാപകർ ദിവസ വേതന അടിസ്ഥാനത്തിൽ ജോലി ചെയ്യുന്നതാണ് രീതി. യുപി, ഹൈസ്‌കൂള്‍, ഹയർസെക്കന്‍ഡറി എന്നിങ്ങനെ ദിവസ വേതനത്തിന്‍റെ കണക്ക് വ്യത്യസ്‌തമാണ്. ഹൈസ്‌കൂളിന് 1100, ഹയർ സെക്കന്‍ഡറിക്ക് 1200 എന്നിങ്ങനെയാണ് താത്‌കാലിക അധ്യാപകരുടെ ദിവസ വേതനം.
എന്നാൽ കഴിഞ്ഞ 5 മാസമായി ഇവർക്ക് ശമ്പളം ലഭിക്കുന്നില്ല. ശമ്പളം നല്‍കാന്‍ ഫണ്ടില്ലെന്ന് ചൂണ്ടിക്കാട്ടിയാണ് ഈ അവഗണന. 2023 ഓഗസ്റ്റിലാണ് ഇവർക്ക് അവസാനമായി ശമ്പളം ലഭിച്ചത്. സംസ്ഥാനത്തുടനീളം ഈ മേഖലയിൽ പ്രവർത്തിക്കുന്ന അധ്യാപകരുടെ എണ്ണം കുറവായതിനാൽ കൂട്ടായ ഒരു സമരത്തിലേക്ക് ഇറങ്ങാനും കഴിയാത്ത സ്ഥിതിയാണുള്ളത്.
പൊതുജനങ്ങളുടെ പ്രശ്‌നങ്ങള്‍ ഉടനടി പരിഹരിക്കുമെന്ന് കൊട്ടിഘോഷിച്ച് സര്‍ക്കാര്‍ നടപ്പാക്കിയ നവകേരള സദസിലും അധ്യാപക സംഘം പരാതിയുമായെത്തി. പരാതി നല്‍കിയ ഇവര്‍ക്ക് നേരിടേണ്ടി വന്നത് കയ്‌പ്പേറിയ അനുഭവമാണ്.
കണ്ണൂർ-ഇരിക്കൂർ മണ്ഡലങ്ങളിലെ നവകേരള സദസിനിടെയാണ് വിദ്യാഭ്യാസ മന്ത്രിക്കും മുഖ്യമന്ത്രിക്കും സംഘം പരാതി നൽകിയത്. പരാതി നല്‍കി ദിവസങ്ങള്‍ പിന്നിട്ടിട്ടും ഒരു മറുപടിയും ലഭിക്കതായതോടെ പരാതി നമ്പർ ട്രാക്ക് ചെയ്‌തു. ഇതോടെ പരാതി ഡിഡിഇ ഓഫിസിലെത്തിയെന്ന് വിവരം ലഭിച്ചു.
പരാതി ലഭിച്ചെന്ന് കരുതി ഡിഡിഇ ഓഫിസിലെത്തി കാര്യം തിരക്കിയപ്പോഴാകട്ടെ അത്തരമൊരു പരാതിയെ കുറിച്ച് അധികൃതര്‍ക്ക് യാതൊന്നും അറിയില്ല. എന്നാല്‍ ഏറെ ദിവസങ്ങള്‍ക്ക് ശേഷം പരാതിക്ക് അപ്രതീക്ഷിതമായൊരു മറുപടിയും ലഭിച്ചു.
നിങ്ങള്‍ നല്‍കിയ പരാതി തങ്ങളുടെ പരിധിയുള്ളതല്ലെന്നായിരുന്നു ആ മറുപടി. സംസ്ഥാന സര്‍ക്കാര്‍ നേരിട്ട് തീര്‍പ്പാക്കേണ്ട പരാതിയായിട്ടും ഇതിന് പരിഹാരമുണ്ടായില്ലെന്ന് അധ്യാപകര്‍ പറയുന്നു.
തളിപ്പറമ്പ് എംഎൽഎ എം.വി ഗോവിന്ദനും സംഘം പരാതി നല്‍കിയിരുന്നു അതിനും മറുപടി ലഭിച്ചില്ലെന്ന് സംഘം പറഞ്ഞു. ശമ്പളത്തിനായി സര്‍ക്കാര്‍ ഓഫിസുകള്‍ കയറിയിറങ്ങിയിട്ടും ഫലം ലഭിക്കാത്തതിനെ തുടര്‍ന്ന് നിരവധി പേര്‍ ജോലി ഉപേക്ഷിച്ചു. അവശേഷിക്കുന്ന ബാക്കിയുള്ളവരാകട്ടെ മന്ത്രി സഭയോഗം വരെ കാത്തിരിക്കുകയാണ്.
ഇനിയും അവഗണന നേരിടേണ്ടി വന്നാല്‍ ബാക്കിയുള്ളവര്‍ക്കും ജോലി ഉപേക്ഷിക്കേണ്ടതായി വരും. തങ്ങളുടെ പരാതിക്ക് മുന്നില്‍ അധികൃതര്‍ കണ്‍തുറക്കുമെന്ന പ്രതീക്ഷയിലാണ് ഇപ്പോഴും അധ്യാപകര്‍.
