കണ്ണൂരിൽ ട്രെയിനിന് നേരെ കല്ലേറ് ; പന്ത്രണ്ട് വയസുകാരിക്ക് തലയ്ക്ക് പരിക്ക്

ഞായറാഴ്‌ച വൈകിട്ട് അഞ്ച് മണിക്ക് മംഗലാപുരം-തിരുവനന്തപുരം എക്‌സ്‌പ്രസിന് നേരെയാണ് കല്ലേറുണ്ടായത്. അമ്മയ്ക്കും അമ്മൂമ്മയ്ക്കും ഒപ്പം യാത്ര ചെയ്യുകയായിരുന്ന കീർത്തന എന്ന പെൺകുട്ടിക്ക് തലയ്ക്ക് പരിക്കേറ്റു

കണ്ണൂർ : ട്രെയിനിന് നേരെയുണ്ടായ കല്ലേറിൽ പന്ത്രണ്ട് വയസുകാരിക്ക് പരിക്ക്. സെപ്റ്റംബർ 11ന് വൈകിട്ട് അഞ്ച് മണിക്ക് മംഗലാപുരം-തിരുവനന്തപുരം എക്‌സ്‌പ്രസിന് നേരെയാണ് കല്ലേറുണ്ടായത്. മംഗലാപുരത്ത് നിന്ന് കോട്ടയത്തേയ്ക്ക് അമ്മയ്ക്കും അമ്മൂമ്മയ്ക്കും ഒപ്പം യാത്ര ചെയ്യുകയായിരുന്ന കീർത്തന എന്ന പെൺകുട്ടിക്കാണ് തലയ്ക്ക് പരിക്കേറ്റത്.

എടക്കാട് സ്‌റ്റേഷനും കണ്ണൂരിനും ഇടയിൽ വച്ചായിരുന്നു സംഭവം. S10 കോച്ചിൽ 49-ാം നമ്പർ സീറ്റിലായിരുന്നു പെൺകുട്ടി. ട്രെയിനിൽ വച്ച് തന്നെ യാത്രക്കാരനായ ഒരു ഡോക്‌ടർ പ്രാഥമിക ചികിത്സ നൽകി. പിന്നീട് തലശ്ശേരി ജനറൽ ആശുപത്രിയിൽ ചികിത്സ തേടി. സംഭവത്തിൽ റെയിൽവേ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.