കണ്ണൂർ: ഇരിക്കുറിൽ സജീവ് ജോസഫിനെ മാറ്റാൻ കഴിയില്ലെന്ന ഉറച്ച നിലപാടുമായി ഹൈക്കമാൻഡ്. സജീവിന്‍റെ സ്ഥാനാര്‍ഥിത്വവുമായി ബന്ധപ്പെട്ട തർക്കം പരിഹരിക്കാന്‍ എം.എം ഹസൻ കെ.സി ജോസഫ് എന്നിവരുടെ നേതൃത്വത്തിൽ നടത്തിയ ചർച്ച പരാജയപ്പെട്ടു. ഇടഞ്ഞു നിൽക്കുന്ന ജില്ലയിലെ എ വിഭാഗം നേതാക്കളുമായാണ് ഇരുവരും ചർച്ച നടത്തിയത്. ഹൈക്കമാൻഡ് നിലപാട് എ ഗ്രൂപ്പ് നേതാക്കളെ അറിയിച്ചു.
സമാന്തര കൺവെൻഷനുമായി മുന്നോട്ട് പോകുമെന്ന് എ ഗ്രൂപ്പ് നേതാക്കളും അറിയിച്ചു. കൺവെൻഷന് ശേഷം മറ്റ് കാര്യങ്ങൾ തീരുമാനിക്കുമെന്ന് സോണി സെബാസ്റ്റ്യൻ ചർച്ചയ്ക്ക് ശേഷം മാധ്യമങ്ങളോട് പറഞ്ഞു. സജീവ് ജോസഫിനെ മാറ്റണമെന്ന ആവശ്യത്തിൽ നിന്നും പിന്നോട്ടില്ലെന്ന ഉറച്ച നിലപാടുമായി എ ഗ്രൂപ്പ് മുന്നോട്ടുപോയാൽ ജില്ലയിലാകെ കനത്ത തിരിച്ചടിയായിരിക്കും യുഡിഎഫിന് ഉണ്ടാവുക. എന്നാല്‍ സമവായ ശ്രമങ്ങൾ തുടരുമെന്നാണ് എംഎം ഹസൻ പറഞ്ഞത്.