കണ്ണൂര്‍: ആന്തൂരിൽ സിപിഎം ഏരിയ കമ്മിറ്റിയംഗത്തിന്‍റെ വീടിന് നേരെ നടന്ന അക്രമത്തിൽ പങ്കില്ലെന്ന് ബിജെപി. ആക്രമണം സിപിഎമ്മിന്‍റെ നാടകമാണെന്നും ബിജെപിയുടെ തലയിൽ കെട്ടിവെക്കാനുള്ള തന്ത്രം ജനം തിരിച്ചറിയണമെന്നും ബിജെപി വ്യക്തമാക്കി. കഴിഞ്ഞ ദിവസം പുലർച്ചെയാണ് സിപിഎം തളിപ്പറമ്പ് ഏരിയാ കമ്മിറ്റി അംഗം സി അശോക് കുമാറിന്‍റെ ഒഴക്രോം കുറ്റിപ്രത്തെ വീടിന് നേരെ അക്രമം ഉണ്ടായത്. വീടിന്‍റെ ജനൽച്ചില്ലുകൾ നാലംഗ സംഘം അടിച്ചു തകർത്തെന്നായിരുന്നു പരാതി. സംഭവത്തിന് പിന്നില്‍ ബിജെപിയാണെന്ന് സിപിഎം ആരോപിച്ചിരുന്നു. എന്നാൽ ഈ ആരോപണങ്ങൾ പാടെ നിഷേധിച്ച് ബിജെപി തളിപ്പറമ്പ് മണ്ഡലം കമ്മിറ്റി രംഗത്തെത്തി.
സിപിഎം ഏരിയ കമ്മിറ്റിയംഗത്തിന്‍റെ വീടിന് നേരെ നടന്ന അക്രമം; പങ്കില്ലെന്ന് ബിജെപി