ഐശ്വര്യകേരള യാത്രയിൽ കോൺഗ്രസ് പ്രവർത്തകർ തമ്മിൽതല്ലി

തദ്ദേശതെരഞ്ഞെടുപ്പ്‌ തോൽവിയുടെ പേരിലായിരുന്നു ശ്രീകണ്ഠാപുരത്ത് കോൺഗ്രസ് പ്രവർത്തകർ ചേരി തിരിഞ്ഞ് ഏറ്റുമുട്ടിയത്.

കണ്ണൂർ:പ്രതിപക്ഷ നേതാവ് രമേശ് ചെന്നിത്തല നയിക്കുന്ന ഐശ്വര്യകേരള യാത്രാ സ്വീകരണത്തിനിടെ തമ്മില്‍ തല്ല്. കോൺഗ്രസ് എ, ഐ ഗ്രൂപ്പ് പ്രവർത്തകർ ചേരിതിരിഞ്ഞ് തമ്മില്‍തല്ലുകയായിരുന്നു. ശ്രീകണ്ഠപുരത്ത് ചൊവ്വാഴ്ച വൈകിട്ട് ഏഴേ മുക്കാലോടെയാണ് സംഭവം. തദ്ദേശതെരഞ്ഞെടുപ്പ്‌ തോൽവിയുടെ പേരിലായിരുന്നു ഏറ്റുമുട്ടൽ. രമേശ് ചെന്നിത്തല എത്തുന്നതിനു മിനിറ്റുകൾക്കു മുമ്പാണ് വേദിക്കരികിൽ കോൺഗ്രസ് പ്രവർത്തകർ തമ്മിൽ രൂക്ഷമായ വാക്പോരും തമ്മിലടിയും നടന്നത്. കോൺഗ്രസ് എ ഗ്രൂപ്പുകാരനായ ജേക്കബ് ചെട്ടിമറ്റത്തെ ഐ ഗ്രൂപ്പിലെ ടിഎൻ ബാലകൃഷ്ണന്‍റെ നേതൃത്വത്തിലുള്ള സംഘം ആക്രമിക്കുകയായിരുന്നു. എ ഗ്രൂപ്പുകാരും സംഘടിച്ചെത്തിയതോടെ കൂട്ടത്തല്ലായി.

തദ്ദേശ തെരഞ്ഞെടുപ്പിൽ ഇരിക്കൂർ മണ്ഡലത്തിലെ യുഡിഎഫ് ശക്തികേന്ദ്രങ്ങളായ ഉദയഗിരി, പയ്യാവൂർ, നടുവിൽ പഞ്ചായത്തുകളിൽ എൽഡിഎഫ് അട്ടിമറി വിജയം നേടിയിരുന്നു. ഇതിന് പിന്നിൽ ഗ്രൂപ്പുകളികളാണെന്നാരോപിച്ച് കോൺഗ്രസിനുള്ളിൽ നേരത്തെ പൊട്ടിത്തെറിയുണ്ടായിരുന്നു. യുഡിഎഫിന്‍റെ പരാജയത്തിന് കാരണമാകും വിധത്തിലുള്ള നേതാക്കളുടെ വാട്സാപ് സന്ദേശം എ ഗ്രൂപ്പുകാരനായ ജേക്കബ് പുറത്ത് വിട്ടിരുന്നു. ഇതാണ് മറുഗ്രൂപ്പുകാരെ പ്രകോപിപ്പിച്ചത്‌.