കണ്ണൂർ : മൂന്ന് വർഷം മുൻപ് തലശേരി നഗരമധ്യത്തില്‍ ബാങ്ക് ജീവനക്കാരി ഓഫീസില്‍ വെടിയേറ്റു മരിച്ച സംഭവത്തില്‍ അന്വേഷണം പൂര്‍ത്തിയായി. പൊലീസ് ശനിയാഴ്‌ച കോടതിയില്‍ കുറ്റപത്രം സമര്‍പ്പിക്കും. ലോഗന്‍സ് റോഡിലെ റാണി പ്ലാസയില്‍ പ്രവര്‍ത്തിച്ചിരുന്ന ഐഡിബിഐ ബാങ്ക് തലശേരി ശാഖയിലെ സെയില്‍സ് സെക്‌ഷന്‍ ജീവനക്കാരിയായ പുന്നോലിലെ വില്‍ന വിനോദിനെ (31) ബാങ്കില്‍ വെടിയേറ്റു മരിച്ച കേസിലാണ് കുറ്റപത്രം സമര്‍പ്പിക്കുന്നത്.
ബാങ്ക് ജീവനക്കാരി വെടിയേറ്റു മരിച്ച സംഭവം: മൂന്ന് വർഷത്തിനു ശേഷം നാളെ കുറ്റപത്രം സമർപ്പിക്കും - idbi bank thalassery
വെടിവെപ്പ് നടന്ന ബാങ്കില്‍ ഫോറന്‍സിക് സംഘം നടത്തിയ പരിശോധനയില്‍ വെടിയേറ്റ് വില്‍നയുടെ തല ചിതറിയതില്‍ അസ്വാഭാവികത കണ്ടെത്തിയിരുന്നു
ബാങ്ക്ജീവനക്കാരി
2016 ജൂണ്‍ രണ്ടിന് രാവിലെ 9.50 നാണ് വില്‍ന വിനോദ് ബാങ്കിനുള്ളില്‍ വെടിയേറ്റ് മരിച്ചത്. സംഭവം നടന്ന് മൂന്നു വര്‍ഷത്തിനു ശേഷമാണ് കേസന്വേഷണം പൂര്‍ത്തിയാക്കി തലശേരി ജുഡീഷല്‍ ഫസ്റ്റ്ക്ലാസ് മജിസ്‌ട്രേറ്റ് കോടതിയില്‍ കുറ്റപത്രം സമര്‍പ്പിക്കുന്നത്. ബാങ്കിലെ സെക്യൂരിറ്റി ജീവനക്കാരനായിരുന്ന അഞ്ചരക്കണ്ടി ഓടക്കടവ് കിനാലൂര്‍ ഹരിശ്രീയില്‍ ഹരീന്ദ്രൻ (51) ആണ് കേസിലെ പ്രതി. ആയുധങ്ങള്‍ ഉപയോഗിക്കുന്നതിന് പ്രത്യേക പരിശീലനം നേടിയ പ്രതി അശ്രദ്ധമായാണ് തോക്കു കൈകാര്യം ചെയ്‌തതെന്നും പ്രതി കുറ്റകരമായ നരഹത്യയാണ് നടത്തിയിട്ടുള്ളതെന്നും പൊലീസ് കുറ്റപത്രത്തില്‍ പറയുന്നുണ്ട്. കൊലപാതകത്തിന് ഉപയോഗിച്ച തോക്കിന്‍റെ ലൈസന്‍സ് സംബന്ധിച്ച രേഖകള്‍ കാശ്‌മീരില്‍ നിന്നാണ് തലശേരി പൊലീസ് ശേഖരിച്ചത്. സംഭവത്തിന്‍റെ ഫോറന്‍സിക് റിപ്പോര്‍ട്ടും കഴിഞ്ഞ ദിവസം അന്വേഷണ സംഘത്തിന് ലഭിച്ചിരുന്നു. വെടിവെപ്പ് നടന്ന ബാങ്കില്‍ ഫോറന്‍സിക് സംഘം നടത്തിയ പരിശോധനയില്‍ വെടിയേറ്റ് വില്‍നയുടെ തല ചിതറിയതില്‍ അസ്വാഭാവികത കണ്ടെത്തിയിരുന്നു. ജീവനക്കാരി വെടിയേറ്റു മരിച്ചിട്ടും നഷ്‌ടപരിഹാരം നല്‍കാതിരുന്ന ബാങ്ക് അധികൃതരുടെ നടപടി ഏറെ പ്രതിഷേധത്തിന് ഇടയാക്കിയിരുന്നു.