കെ.സുരേന്ദ്രനെ വേട്ടയാടുന്നത് സ്വർണക്കടത്തിലെ കള്ളക്കളികൾ പുറത്തു കൊണ്ടുവന്നതിന്: എ.പി അബ്ദുള്ളക്കുട്ടി

കൊടകരയിൽ നടന്നത് കവർച്ചയാണെന്നും അതിൽ സി.പി.എമ്മുമായി ബന്ധമുള്ളവരും പങ്കാളികളാണെന്നും അബ്ദുള്ളക്കുട്ടി പറഞ്ഞു.

കണ്ണൂർ: കേരളത്തിൽ കഴിഞ്ഞ തെരഞ്ഞെടുപ്പ് കാലത്ത് കള്ളപ്പണമൊഴുക്കിയത് മുഖ്യമന്ത്രി പിണറായി വിജയനാണെന്ന് ബി.ജെ.പി ദേശീയ ഉപാധ്യക്ഷൻ എ.പി അബ്ദുള്ളക്കുട്ടി. മൂന്ന് കോടി രൂപ വീതമാണ് കഴിഞ്ഞ തെരഞ്ഞെടുപ്പിൽ പിണറായി കളളപ്പണമായി ഒഴുകിയത്. ഈ പണത്തിന്‍റെ ഉറവിടം എവിടെയാണെന്ന് അന്വേഷിക്കണം. കിറ്റുകൊടുത്തും പെൻഷൻ കൊടുത്തുമല്ല പിണറായി വീണ്ടും അധികാരത്തിൽ വന്നത്.

കൊലപാതക രാഷ്ട്രീയം കൊണ്ട് സംഘപരിവാർ പ്രസ്ഥാനത്തെ തകർക്കാൻ ശ്രമിച്ചവരാണ് ഇപ്പോൾ കുഴൽപണ കേസിൽ ബി.ജെ.പി നേതാക്കളെ കുടുക്കാൻ ശ്രമിക്കുന്നത്. കഴിഞ്ഞ ഭരണത്തിൽ പിണറായിയും കൂട്ടാളികളും നടത്തിയ സ്വർണക്കടത്ത് കേസിലെ കള്ളക്കളികൾ പുറത്തു കൊണ്ടുവന്നതിനാണ് കെ.സുരേന്ദ്രനെ വേട്ടയാടുന്നത്.

കൊടകരയിൽ നടന്നത് കവർച്ചയാണെന്നും അതിൽ സി.പി.എമ്മുമായി ബന്ധമുള്ളവരും പങ്കാളികളാണെന്നും അബ്ദുള്ളക്കുട്ടി പറഞ്ഞു. പാർട്ടി നേതാക്കളെ കള്ളക്കേസിൽ കുടുക്കുന്നതിൽ പ്രതിഷേധിച്ച് കണ്ണൂർ കലക്ടറേറ്റിന് മുമ്പില്‍ ബി.ജെ.പി ജില്ലാ കമ്മിറ്റിയുടെ നേതൃത്വത്തിൽ നടത്തിയ പ്രതിഷേധ സമരം ഉദ്ഘാടനം ചെയ്തു സംസാരിക്കുകയായിരുന്നു അബ്ദുള്ളക്കുട്ടി.