ഇടുക്കി: ചിന്നക്കനാൽ ആനയിറങ്കലിന് സമീപം വിനോദ സഞ്ചാരികൾ സഞ്ചരിച്ച വാഹനത്തിന് നേരെ കാട്ടാന ആക്രമണം. സഞ്ചാരികളുടെ ബഹളം കേട്ട് ഓടിയെത്തിയ പ്രദേശവാസി പാണ്ടി കങ്കാണിയ്ക്ക് പരിക്കേറ്റു. ഇയാളെ അടിമാലി താലൂക്ക് ആശുപത്രിയിൽ പ്രവേശിപ്പിച്ചു.
വിനോദ സഞ്ചാരികളുടെ കരച്ചിൽ കേട്ട് വാഹനത്തിന് അടുത്തേക്ക് ഓടിയെത്തിയ പാണ്ടി കങ്കാണിയ്ക്ക് നേരെ ആന പാഞ്ഞടുക്കുകയായിരുന്നു. ഓടി രക്ഷപെടാൻ ശ്രമിക്കുന്നതിനിടെ നിലത്തു വീണാണ് ഇയാൾക്ക് പരിക്കേറ്റത്.
പിന്നീട് നാട്ടുകാർ എത്തി സഞ്ചാരികളെ രക്ഷിച്ചു. തുടർന്ന് പാണ്ടിയെ നാട്ടുകാരുടെ നേതൃത്വത്തിൽ ആശുപത്രിയിൽ പ്രവേശിപ്പിക്കുകയായിരുന്നു.