ഇടുക്കി അണക്കെട്ടിൽ നീരൊഴുക്ക് ശക്തം ; ജലനിരപ്പ് 2396.04 അടി പിന്നിട്ടു

ജലനിരപ്പ് 2396.86 അടിയിലേക്കെത്തിയാൽ ഓറഞ്ച് അലർട്ട്‌ പുറപ്പെടുവിക്കും

ഇടുക്കി : സംസ്ഥാനത്തെ ഏറ്റവും വലിയ ജലവൈദ്യുത പദ്ധതിയായ ഇടുക്കി അണക്കെട്ടില്‍ ജലനിരപ്പ് 2396.04 അടി പിന്നിട്ടു. പദ്ധതി പ്രദേശത്ത് മഴ തുടരുന്നതിനാൽ ഡാമിലേക്ക് നീരൊഴുക്ക് ശക്തമാണ്. സംഭരണ ശേഷിയുടെ 91.92% വെള്ളമാണ് നിലവിൽ അണക്കെട്ടിൽ ഉള്ളത്.

അണക്കെട്ടിലേക്കുള്ള നീരൊഴുക്ക് വർധിച്ച സാഹചര്യത്തിൽ ആദ്യത്തെ ജാഗ്രതാനിർദേശമായ ബ്ലൂ അലർട്ട് പുറപ്പെടുവിച്ചിരുന്നു. ജലനിരപ്പ് 2396.86 അടിയിലെത്തിയാൽ ഓറഞ്ച് അലർട്ടും 2397.86 അടിയിലെത്തിയാൽ റെഡ് അലർട്ടും നല്‍കും.

ഇടുക്കി അണക്കെട്ടിന്‍റെ പരമാവധി സംഭരണ ശേഷി 2408.5 അടിയാണ്. മേഖലയില്‍ മഴ തുടർന്നാൽ ഡാം തുറക്കേണ്ട സാഹചര്യത്തിലേക്ക് എത്തും. കല്ലാർകുട്ടി, ലോവർ പെരിയാർ, മാട്ടുപ്പെട്ടി, മലങ്കര, കല്ലാർ, കുണ്ടള അണക്കെട്ടുകൾ നേരത്തേ തുറന്നിരുന്നു.