ഇടുക്കിയിൽ ട്രക്ക് മറിഞ്ഞ് അപകടം; ഡ്രൈവർക്ക് പരിക്ക്

തമിഴ്‌നാട്ടിൽ നിന്നും മെഡിക്കൽ ഉപകരണങ്ങളുമായി അങ്കമാലിക്ക് പോകുകയായിരുന്ന ട്രക്കാണ് പൊന്മുടി അണക്കെട്ടിന് സമീപത്തുവച്ച് നിയന്ത്രണംവിട്ട് മറിഞ്ഞത്.

ഇടുക്കി: ഇടുക്കി പൊന്മുടി അണക്കെട്ടിന് സമീപം ട്രക്ക് മറിഞ്ഞ് അപകടം. ഇന്ന് പുലർച്ചെ നാലുമണിയോടെയാണ് അപകടമുണ്ടായത്. ഡ്രൈവർ തമിഴ്‌നാട് സ്വദേശി കാർത്തിക്ക് നിസാര പരിക്കുകളോടെ രക്ഷപ്പെട്ടു.

തമിഴ്‌നാട് മധുരയിൽ നിന്നും മെഡിക്കൽ ഉപകരണങ്ങളുമായി അങ്കമാലിക്ക് പോകുകയായിരുന്ന ട്രക്കാണ് അപകടത്തിൽപ്പെട്ടത്. രാജാക്കാട്ടിൽ നിന്നും പന്നിയാർകൂട്ടി വഴി പോകേണ്ട വാഹനം കുളത്തറ കുഴി കവല തിരിയാതെ പൊൻമുടി ഡാം ടോപ്പ് റൂട്ടിലൂടെ പോകുകയായിരുന്നു. ഇതിനിടെ നിയന്ത്രണം നഷ്‌ടപ്പെട്ട വാഹനം റോഡ് സൈഡിലെ പാറക്കെട്ടിൽ ഇടിച്ച് മറിഞ്ഞു.

വാഹനം റോഡിൽ നിന്നും കുറച്ചുകൂടി തെന്നി നീങ്ങിയിരുന്നെങ്കിൽ അണക്കെട്ടിലേക്ക് പതിക്കുമായിരുന്നു. വാഹനത്തിൽ കുടുങ്ങിക്കിടന്ന കാർത്തിക്കിനെ പുറകെ വന്ന മറ്റൊരു ലോറിയിലെ ഡ്രൈവർ പുറത്തെടുത്ത് പൊലീസിൽ വിവരം അറിയിക്കുകയായിരുന്നു. രാജാക്കാട് പൊലീസ് എത്തിയാണ് ഇയാളെ ആശുപത്രിയിൽ എത്തിച്ചത്.

ഇടിയുടെ ആഘാതത്തിൽ ട്രക്കിന്‍റെ ക്യാബിൻ പൂർണ്ണമായി തകർന്നു. അപകടത്തെത്തുടർന്ന് പൊന്മുടി ഡാം ടോപ്പ് റോഡിലെ ഗതാഗതം പൂർണമായും തടസപ്പെട്ടു.