ഇടുക്കി: കാലവര്‍ഷത്തില്‍ തകര്‍ന്ന കൊച്ചി -ധനുഷ്‌ക്കോടി ദേശിയപാതയിലെ രണ്ടാംമൈല്‍ ഭാഗം അപകട തുരുത്താകുന്നു. ദേശിയപാതയുടെ സംരക്ഷണ ഭിത്തി ഇടിഞ്ഞ് രണ്ടാംമൈല്‍ ആനച്ചാല്‍ റോഡിലേക്ക് പതിക്കുകയാണുണ്ടായത്. കനത്ത മഞ്ഞ് മൂടുന്ന സമയങ്ങളില്‍ പാതയുടെ വിസ്താരക്കുറവറിയാതെ എത്തുന്ന വാഹനങ്ങള്‍ അപകടത്തില്‍പ്പെടാനുള്ള സാധ്യത കൂടുതലാണ്.
അപകട ഭീഷണിയുയർത്തി കൊച്ചി- ധനുഷ്‌ക്കോടി ദേശിയപാതയിലെ രണ്ടാംമൈല്‍ മൂന്നാറിലേക്കെത്തുന്ന സഞ്ചാരികൾ രണ്ടാംമൈലിലിറങ്ങി പ്രകൃതി ഭംഗിയാസ്വദിച്ചാണ് മടങ്ങാറ്. ഇക്കാരണം കൊണ്ട് തന്നെ രണ്ടാംമൈലിൽ സദാ സമയവും സഞ്ചാരികളുടെ തിരക്കനുഭവപ്പെടാറുണ്ട്. കൂടുതൽ സഞ്ചാരികള്‍ എത്തിതുടങ്ങിയാല്‍ ഇവിടം വാഹനങ്ങളുടെ വലിയ തിരക്കനുഭവപ്പെടുന്ന പ്രദേശമായി മാറും. ഈ സാഹചര്യത്തിലാണ് ഇടിഞ്ഞ് പോയ ഭാഗത്ത് പുനര്‍നിര്‍മാണം നടത്താന്‍ നടപടി കൈകൊള്ളണമെന്ന ആവശ്യം പ്രദേശവാസികളും വാഹനയാത്രികരും മുമ്പോട്ട് വയ്ക്കുന്നത്.
