ഇടുക്കി : കഴിഞ്ഞ ദിവസം പുലർച്ചെ 3.30 ഓടെയാണ് നെടുങ്കണ്ടത്തിന് സമീപം കോമ്പയാറില്‍ ഏലക്കാ സ്റ്റോറില്‍ വന്‍ സ്‌ഫോടനവും അഗ്നിബാധയും ഉണ്ടായത്. സ്വകാര്യ വ്യക്തിയുടെ ഏലം ഡ്രയര്‍ പ്രവര്‍ത്തിക്കുന്ന കെട്ടിടമാണ് തകര്‍ന്ന് തീപ്പിടിച്ചത്. സ്‌ഫോടനത്തില്‍ കെട്ടിടത്തിന്‍റെ ഇരുമ്പ് ഷട്ടറും വാതിലുകളും ജനലുകളും ചിതറിത്തെറിച്ചു. നാലര ലക്ഷം രൂപയുടെ നഷ്‌ടം ഉണ്ടായതായി കണക്കാക്കപ്പെടുന്നു.
കോമ്പയാര്‍ ടൗണിന് സമീപത്തെ ഏലം ഡ്രയറില്‍ ബോംബ് സ്ഫോടനം ഉണ്ടായെന്ന തരത്തിലാണ് തിങ്കളാഴ്‌ച പുലര്‍ച്ചെ പ്രദേശത്ത് വാര്‍ത്ത പരന്നത്. ഇത് പ്രദേശവാസികളില്‍ ഭീതിപരത്തി. പിന്നീട് പൊലീസെത്തി നടത്തിയ പരിശോധനകളിലാണ് ബോംബ് സ്ഫോടനം അല്ലെന്ന് സ്ഥിരീകരിച്ചത്.
തീയിട്ടത് വെന്‍റിലേഷന്‍ ഹോളിലൂടെ ഇന്ധനമൊഴിച്ചെന്ന് നിഗമനം ; കോമ്പയാർ സ്ഫോടനം ആസൂത്രിതമെന്ന് പൊലീസ്