ലോറി ജീപ്പിലിടിച്ച് തോട്ടം തൊഴിലാളി സ്ത്രീ മരിച്ചു; രണ്ട് പേർക്ക് ഗുരുതര പരിക്ക്

സൂര്യനെല്ലി കറുപ്പന്‍ കോളനിയിലെ വിജി ചന്ദ്രശേഖരന്‍ (38) ആണ് മരിച്ചത്. സൂര്യനെല്ലി സ്വദേശികളായ ചിത്രാദേവി, രമേശ് എന്നിവർക്കാണ് സാരമായി പരിക്കേറ്റത്.

ഇടുക്കി: എസ്റ്റേറ്റ് പൂപ്പാറയില്‍ നിയന്ത്രണം വിട്ട ലോറി ജീപ്പിലിടിച്ച് തോട്ടം തൊഴിലാളി സ്ത്രീ മരിച്ചു. രണ്ട് പേർക്ക് ഗുരുതര പരിക്ക്. സൂര്യനെല്ലി കറുപ്പന്‍ കോളനിയിലെ വിജി ചന്ദ്രശേഖരന്‍ (38) ആണ് മരിച്ചത്. സൂര്യനെല്ലി സ്വദേശികളായ ചിത്രാദേവി, രമേശ് എന്നിവർക്കാണ് സാരമായി പരിക്കേറ്റത്. രാവിലെ എട്ടരയോടെ എസ്റ്റേറ്റ് പൂപ്പാറ ലൈൻസിന് സമീപമാണ് അപകടം നടന്നത്. സൂര്യനെല്ലിയിൽ നിന്നും തൊഴിലാളികളുമായി രാജകുമാരി ഭാഗത്തേക്ക് പോവുകയായിരുന്ന ജീപ്പിൽ രാജാക്കാട് ഭാഗത്ത് നിന്നും വന്ന ലോറി നിയന്ത്രണം വിട്ട് ഇടിക്കുകയായിരുന്നു. ഡ്രൈവർ ഉൾപ്പെടെ 10 പേരാണ് ജീപ്പിലുണ്ടായിരുന്നത്.

ശബ്‌ദം കേട്ട് ഓടിക്കൂടിയ നാട്ടുകാർ രക്ഷാപ്രവർത്തനം നടത്തി. പരിക്കേറ്റ മൂവരെയും രാജകുമാരിയിലെ സ്വകാര്യ ആശുപത്രിയിൽ എത്തിച്ചെങ്കിലും വിജി മരിക്കുകയായിരുന്നു. രമേശിന് തലക്കും ചിത്രാദേവിക്ക് തോളിനുമാണ് പരിക്കേറ്റിട്ടുള്ളത്. പ്രഥമ ശുശ്രൂഷക്ക് ശേഷം ഇവരെ അടിമാലി താലൂക്ക് ആശുപത്രിയിൽ പ്രവേശിപ്പിച്ചു. ശാന്തൻപാറ പൊലീസ് അപകടത്തിൽ അന്വേഷണമാരംഭിച്ചു.