സിപിഐയെ കൈയേറ്റക്കാരായി ചിത്രീകരിക്കാനുള്ള ശ്രമം നടന്നു : മുന്‍ മന്ത്രി കെ ഇ ഇസ്‌മായില്‍

സിപിഐ ഭൂമി കയ്യേറി എന്ന് ചില രാഷ്‌ട്രീയ പാര്‍ട്ടികളും മാധ്യമങ്ങളും ആരോപിച്ചിരുന്നു. എന്നാല്‍ അത് അടിസ്ഥാനരഹിതമാണെന്ന് തെളിഞ്ഞതായും മറ്റ് പല പാര്‍ട്ടികളും ഭൂമി കൈയേറ്റം നടത്തിയിട്ടുണ്ടെന്നും മുന്‍ റവന്യു മന്ത്രി കെ ഇ ഇസ്‌മായില്‍ പറഞ്ഞു

ഇടുക്കി: സിപിഐയെ കൈയേറ്റക്കാരായി ചിത്രീകരിക്കാന്‍, ചില രാഷ്‌ട്രീയ പാര്‍ട്ടികളും മാധ്യമങ്ങളും ശ്രമിച്ചിരുന്നതായി മുന്‍ റവന്യു മന്ത്രി കെ ഇ ഇസ്‌മായില്‍. ഇടുക്കിയില്‍ അടക്കം ആരോപണങ്ങള്‍ ഉന്നയിച്ചെങ്കിലും, അടിസ്ഥാന രഹിതമാണെന്ന് തെളിഞ്ഞു. എന്നാല്‍ മറ്റ് പല പാര്‍ട്ടികളും ഭൂമി കൈയേറ്റം നടത്തിയിട്ടുണ്ടെന്ന് അദ്ദേഹം അണക്കരയില്‍ പറഞ്ഞു.

സിപിഐ എന്നും ജനങ്ങള്‍ക്ക് വേണ്ടി പ്രവര്‍ത്തിക്കുന്ന രാഷ്‌ട്രീയ പ്രസ്ഥാനമാണ്. പാര്‍ട്ടിയുടെ ജനകീയ പിന്തുണ അട്ടിമറിക്കാനാണ് ചില കേന്ദ്രങ്ങള്‍ കള്ളക്കഥകളും അടിസ്ഥാനരഹിതമായ ആരോപണങ്ങളും ഉന്നയിച്ചതെന്നും കെ ഇ ഇസ്‌മായില്‍ പറഞ്ഞു. അണക്കരയില്‍ സിപിഐ ഉടുമ്പന്‍ചോല മണ്ഡലം സമ്മേളനം ഉദ്‌ഘാടനം ചെയ്‌ത് സംസാരിക്കുകയായിരുന്നു അദ്ദേഹം.