ഇടുക്കി : ഉദ്യോഗസ്ഥരുടെ കെടുകാര്യസ്ഥതയുടെ ഉത്തമ ഉദാഹരണമാണ് പള്ളിവാസൽ എക്സ്റ്റൻഷൻ പദ്ധതി. 2007-ൽ 268 കോടി രൂപ മുതൽ മുടക്കിൽ ആരംഭിച്ച പദ്ധതി ഒരു വ്യാഴവട്ടക്കാലം പിന്നിട്ടിട്ടും പൂർത്തീകരിക്കാനായിട്ടില്ല.
60 മെഗാവാട്ട് വൈദ്യുതി ഉത്പാദിപ്പിക്കാന്‍ സാധിക്കുന്ന പദ്ധതിയാണ് ലക്ഷ്യമിട്ടത്. എന്നാല്‍ 2011 മാർച്ചിൽ പൂർത്തീകരിക്കേണ്ട പദ്ധതി പതിമൂന്ന് വർഷങ്ങൾ പിന്നിടുമ്പോൾ ജീർണാവസ്ഥയിലാണ്. പദ്ധതിക്കായി മുടക്കിയ കോടികളാണ് പാഴാകുന്നത്. പദ്ധതി പുനരുജ്ജീവിപ്പിക്കണമെങ്കില്‍ ഇനിയും 250 കോടി രൂപയോളം വേണ്ടിവരും.
ഹൈക്കോടതി ഇടപെടലിനെ തുടർന്ന് 2018ൽ പദ്ധതി പുനരാരംഭിച്ചിരുന്നു. 2021 ഏപ്രിൽ മാസത്തിൽ ടണലിന്‍റെ നിർമാണ പ്രവർത്തനങ്ങൾ പൂർത്തീകരിച്ചു. ഇനി പവർ ഹൗസിലെ ജനറേറ്ററിന്‍റെയും ടർബൈന്‍റെയും ജോലികളാണ് തീര്‍ക്കേണ്ടത്.
യന്ത്രങ്ങള്‍ കേടാകുന്നു
ചൈനയിൽ നിന്നും ഇറക്കുമതി ചെയ്‌ത 30 മെഗാവാട്ടിന്‍റെ രണ്ട് ജനറേറ്ററുകളിൽ ഒരെണ്ണം ചൈനീസ് എൻജിനിയർമാരുടെ സഹായത്തോടെ 2010-ൽ സ്ഥാപിക്കുകയും ചെയ്‌തു. രണ്ടാമത്തെ ജനറേറ്റർ സ്ഥാപിക്കുന്നതിനും ഇവരുടെ സഹായം വേണമെന്നാണ് ഉദ്യോഗസ്ഥർ പറയുന്നത്.
എന്നാൽ കാലാവധി(defects liability period) കഴിഞ്ഞതിനാൽ ചൈനീസ് കമ്പനി നൽകിയിരിക്കുന്ന യന്ത്രങ്ങള്‍ക്ക് കേടുപാടുകൾ സംഭവിച്ചാല്‍ പരിഹരിക്കാൻ കമ്പനിയില്‍ നിന്ന് സേവനം ലഭിക്കില്ല.
മുന്‍ പ്രോജക്ട് മാനേജരുടെ പ്രതികരണം ഉദ്യോഗസ്ഥർക്കെതിരെ കമ്മിഷൻ ആരോപണം
ഈ കാരണത്താൽ ഇതേവിലയുള്ള പുതിയ ജനറേറ്റർ ഇറക്കുമതി നടത്തി സ്ഥാപിക്കാനാണ് വൈദ്യുതി ബോർഡ് ലക്ഷ്യമിടുന്നത്. കോടികൾ വിലവരുന്ന യന്ത്രങ്ങൾ ഇറക്കുമതി ചെയ്ത് കമ്മിഷൻ തട്ടാനുള്ള നീക്കമാണ് ഇതിന് പിന്നിലെന്നും അതിനായി നിർമാണ പ്രവർത്തനങ്ങൾ മനപ്പൂര്‍വം വൈകിപ്പിക്കുന്നതാണെന്ന ആരോപണവും ഉയരുന്നുണ്ട്.
also read:ഇടമലക്കുടിയിൽ അനുമതിയില്ലാതെ പ്രവേശിച്ചു ; സുജിത് ഭക്തനെതിരെ അന്വേഷണം
1940 -ൽ സ്ഥാപിച്ച പെൻസ്‌റ്റോക്ക് പൈപ്പുകളാണ് നിലവിലുള്ളത്. പലപ്പോഴും ഈ പൈപ്പുകൾക്ക് ചോർച്ച ഉണ്ടാകുന്നത് പ്രദേശവാസികളെ ആശങ്കയിലാക്കുന്നു.
വലിയ അപകട ഭീഷണി ഉയർത്തുന്ന ഈ പെൻസ്റ്റോക്കുകൾ മാറ്റി സ്ഥാപിക്കുന്നതിന് പുതിയ എക്സ്റ്റൻഷൻ പദ്ധതി എത്രയും വേഗം പൂർത്തീകരിക്കേണ്ടതുണ്ട്. പദ്ധതി വൈകുന്നത് പ്രദേശവാസികളുടെ ജീവനും സ്വത്തിനും ഭീഷണിയായി മാറിയിരിക്കുകയാണ്.
