കടബാധ്യത; ഇടുക്കിയിൽ വീണ്ടും ആത്മഹത്യ

മരിച്ച വ്യക്തിക്ക് അഞ്ച് ലക്ഷത്തിൽപരം കടബാധ്യതയുണ്ടായിരുന്നുവെന്നും തിരിച്ചടക്കാൻ സാഹചര്യമില്ലാത്തതിനെ തുടർന്ന് ആത്മഹത്യ ചെയ്യുകയുമായിരുന്നുവെന്നും ഇയാളുടെ ബന്ധുക്കൾ പറഞ്ഞു.

ഇടുക്കി: ലോക്ക്ഡൗൺ പ്രതിസന്ധിയിലെ കടബാധ്യതയെ തുടർന്ന് സംസ്ഥാനത്ത് ഒരാൾ കൂടി ആത്മഹത്യ ചെയ്‌തു. ഇടുക്കി തൊട്ടിക്കാനത്ത് കടയുടമയായ കുഴിയാമ്പാട്ട ദാമോദരനാണ് മരിച്ചത്. കടയ്ക്കുള്ളില്‍ വിഷം കഴിച്ച്‌ മരിച്ച നിലയിലാണ് ഇയാളെ കണ്ടെത്തിയത്.

ബുധനാഴ്‌ച രാവിലെ കടയിലെത്തിയ ദാമോദരന്‍ ഷട്ടര്‍ താഴ്ത്തിയതിന് ശേഷം വിഷം കഴിക്കുകയായിരുന്നു. വൈകിട്ട് കടയ്ക്കുള്ളില്‍ നിന്ന് ശബ്‌ദം കേട്ട നാട്ടുകാർ ഷട്ടർ ഉയർത്തുമ്പോഴാണ് ദാമോദരനെ ഗുരുതരാവസ്ഥയിൽ കണ്ടെത്തിയത്. ഉടന്‍ തന്നെ ആശുപത്രിയില്‍ പ്രവേശിപ്പിച്ചെങ്കിലും രാവിലെ മരിക്കുകയായിരുന്നു. മൃതദേഹം പോസ്റ്റുമോര്‍ട്ടത്തിന് ശേഷം കുടുംബത്തിന് വിട്ട് നൽകും.

ദാമോദരന് അഞ്ച് ലക്ഷം രൂപയുടെ കടബാധ്യത ഉണ്ടായിരുന്നുവെന്ന് സുഹൃത്തുക്കള്‍ പറയുന്നു. ലോക്ക്ഡൗണില്‍ കച്ചവടം മുടങ്ങിയതോടെ കടംപെരുകിയെന്നും സ്വകാര്യ വ്യക്തികളില്‍ നിന്നടക്കം ഇയാൾ കടം വാങ്ങിയിരുന്നുവെന്നും ഇവർ പറയുന്നു. ഇതിന്‍റെ തിരിച്ചടവിനായി പലരോടും പണം ചോദിച്ചിരുന്നുവെന്നും ഇവർ കൂട്ടിച്ചേർത്തു. ലോക്ക്ഡൗൺ പ്രതിസന്ധിയെ തുടര്‍ന്ന് കഴിഞ്ഞ മാസവും ജില്ലയില്‍ രണ്ടു വ്യാപാരികള്‍ ജീവനൊടുക്കിയിരുന്നു.